गोव्यातील भाजप नेत्यांनी उत्पलला डावलून मोदींचा पराभव केला

गोव्यात माजी मुख्यमंत्री लक्ष्मीकांत पार्सेकर यांना उमेदवारी नाकारली जाणे तसेच उत्पल पर्रीकरानांही त्यांच्या पसंतीच्या पणजी मतदारसंघातून उमेदवारी देण्यास नकार देणे, या दोन घटना गोव्याच्या राजकारणात लक्षवेधी ठरल्या आहेत. (Goa Assembly Election News Updates)

उत्पल पर्रिकरांच्या (Utpal Parrikar) अपक्ष लढण्याच्या निर्णयानंतरही शिवसेनेचे (ShivSena) नेते संजय राउत (Sanjay Raut) यांनी पर्रिकर पुत्राला पाठिंबा दर्शविला आहे. या आधीही राउत यांनी गोव्यात उत्पल यांना शिवसेनेचे तिकिट देण्याचा अप्रत्यक्ष प्रस्ताव दिला होता. आणि आज पणजी मतदारसंघाचा उल्लेख करत भाजपच्या एका निर्णयामुळे देशाच्या पंतप्रधानांचा पराभव झाल्याची टीका संजय राउत यांनी केली.

"उत्पल पर्रिकर प्रवाहाविरूद्ध, पणजी मतदारसंघातून लढत आहेत त्यामुळे त्यांना सर्व राजकीय पक्षांनी पाठिंबा दिला पाहिजे. त्यांची लढाई अन्यायाविरूद्ध आहे. देशाच्या राजकारणाचे प्रवाह स्वच्छ करण्याच्या गोष्टी पंतप्रधान मोदी (PM Modi) यांनी केल्या होत्या. देशाची राजकीय परिस्थिती निटनेटकी राहण्याची बाब त्यांच्याच डोक्यातून आली होती. पण आता त्याच्याच पक्षाने गोव्यात अनैतिक राजकारण केले आहे. आरोपी असलेल्या नेत्यांना तिकिट देवून पणजीतल्या भाजपच्या (BJP) नेत्यांनी मोदींचा पराभव केला आहे. एवढेच नव्हे तर गोव्यात भाजपने ड्रग माफिया, बलात्कारी, भ्रष्टाचारी आणि क्रिमिनल रेकॉर्ड असलेल्या नेत्याला पणजी (Panaji) मतदार संघाची उमेदवारी दिली म्हणून उत्पल यांना अपक्ष लढावे लागत आहे, आणि म्हणूनच उत्पल पर्रिकरांच्या प्रामाणिक लढ्यामध्ये आम्ही त्यांच्या सोबत आहोत, कारण उत्पल पर्रिकरांचा मुद्दा पणजीपुरता मर्यादित नाही तर तो देशाच्या राजकारणाचा भाग बनला आहे," असे संजय राउत आज बोलत होते.

गोव्यासारख्या लहान राज्यात पक्षांतरांचे वारे जोरदार वाहत आहे. भाजपचा ( BJP) विचार करता माजी मुख्यमंत्री लक्ष्मीकांत पार्सेकर यांना उमेदवारी नाकारली जाणे, उत्पल पर्रिकरांना डावलून एका आरोपी आणि क्रिमिनल रेकॉर्ड असलेल्या नेत्याला तिकिट दिल्याने अवघ्या राज्याचे लक्ष आता पणजी मतदार संघाकडे लागले आहे. येणार काळ कसा असणार पणजीमध्ये कोण बाजी मारणार हे तर गोवेकर ठरवतीलच मात्र देशातील बड्या राजकीय नेत्यांचेही गोवा निवडणुकीकडे (Goa Election 2022) लक्ष असणार आहे हे नक्कीच.