Bihar: मुख्यमंत्री नितीश कुमार यांना कोरोनाची लागण

देशात कोरोनाच्या रुग्णांची संख्या वाढत असतानाच या विषाणूच्या विळख्यात असलेल्या राजकारण्यांची संख्याही वाढत आहे. यातच आता बिहारचे मुख्यमंत्री नितीश कुमार देखील कोरोना पॉझिटीव्ह आले आहेत. मुख्यमंत्री कार्यालयाने (CMO) जारी केलेल्या ट्विटमध्ये ही माहिती देण्यात आली आहे. विशेष म्हणजे, बिहारचे दोन्ही उपमुख्यमंत्री, तारकिशोर प्रसाद आणि रेणू देवी 5 जानेवारीला कोरोना पॉझिटिव्ह आढळले होते. याशिवाय राज्याचे दोन मंत्री सुनील कुमार आणि अशोक चौधरी यांनाही कोरोनाची लक्षणे आढळली होती.

दुसरीकडे केंद्रीय संरक्षण मंत्री राजनाथ सिंह यांनाही कोरोनाची लागण झाली आहे. राजनाथ यांनी सोमवारी एका ट्विट करुन म्हटलं की, ‘’लक्षणे अतिशय सौम्य असली तरी मला आज कोरोनाची लागण झाली आहे. मी सध्या होम क्वारंटाईनमध्ये आहे. नुकतेच माझ्या संपर्कात आलेल्या सर्वांना मी विनंती करतो की त्यांनी चाचणी करुन स्वतःला वेगळे करावे.’’ विशेष म्हणजे, अलीकडेच अनेक राजकारणी कोरोना पॉझिटिव्ह आले आहेत, ज्यात दिल्लीचे मुख्यमंत्री अरविंद केजरीवाल, तामिळनाडूतील भाजप नेत्या खुशबू सुंदर, भाजप खासदार मनोज तिवारी, राष्ट्रवादीच्या खासदार सुप्रिया सुळे, केंद्रीय मंत्री महेंद्र नाथ पांडे आणि काँग्रेस नेते रणदीप सुरजेवाला आणि दीपेंद्र हुडा यांचा समावेश आहे.