गोव्यासारख्या शॅक्स उभारण्याच्या योजनेला ओडिशात विरोध

पुरीचे (Puri) शंकराचार्य स्वामी निछलानंद सरस्वती पुरी आणि कोणार्कच्या (Konark) समुद्रकिनाऱ्यावर गोव्यासारख्या (Goa) शॅक्स (shacks) बांधण्याच्या ओडिशा सरकारच्या (Odisha Government)योजनेला विरोध करत आहे. या योजनेला विरोध करतांना त्यांच्याबाजूने सुमारे 50 विविध संघटना उभ्या आहेत. या शॅक्सच्या माध्यमातून या ठिकाणी पर्यटकांना दारू पुरवण्याची योजना असल्याचे सांगण्यात येत आहे. (Beach cottage scheme is being opposed in Odisha)

ओडिशा एक्साइज पॉलिसी, 2021 अंतर्गत प्रस्तावित समुद्रकिनाऱ्यावर बांधल्या जाणाऱ्या शॅक्समधून पर्यटकांना दारू पुरवली जाणार आहे. पुरीच्या स्थानिक रहिवाशांसह मोठ्या संख्येने लोकांनी सरकारच्या योजनेवर चिंता व्यक्त केली आहे आणि समुद्रकिनाऱ्यावर शॅक्स बांधण्याच्या निविदा त्वरित थांबविण्याची मागणी केली आहे.

राज्य सरकारच्या अशा हालचालीबद्दल निराशा व्यक्त करत शंकराचार्य गुरुवारी म्हणाले की, श्री जगन्नाथ धाम पुरी हे आध्यात्मिक आणि धार्मिक चिंतनाचे ठिकाण आहे. कोणत्याही परिस्थितीत, पुरीच्या किनाऱ्यावर मद्य आणि इतर मादक पदार्थांना परवानगी देणार नाही. पुरी समुद्रकिनाऱ्यावर तीन किलोमीटरपर्यंत भजन, कीर्तन आणि आरतीचे ठिकाणं असावे अशी माझी मागणी आहे. पुरी समुद्रकिनारी ओडीशा सरकारचा हा प्रस्ताव अमान्य आहे.

महिला कार्यकर्त्यांनीही राज्य सरकारच्या योजनेवर चिंता व्यक्त केली

दरम्यान, सामाजिक संस्थांच्या शिष्टमंडळाने पुरीचे जिल्हा दंडाधिकारी समर्थ वर्मा यांची भेट घेतली आणि पुरी जिल्ह्यातील पर्यटन विकासाच्या नावाखाली समुद्रकिनाऱ्यावरील 'शॅक्स' योजना मागे घेण्याची मागणी केली. अनेक महिला कार्यकर्त्यांनीही राज्याच्या योजनेवर चिंता व्यक्त केली. समुद्रकिनाऱ्यावर शॅक्स उभारल्याने ओडिशामध्ये महिलांविरुद्धच्या गुन्ह्यांना दुजोरा मिळेल असा दावाही करण्यात आला आहे.

पुरीचे जिल्हा दंडाधिकारी समर्थ वर्मा यांनी पत्रकारांना सांगितले की, या संदर्भात कोणताही निर्णय घेण्यापूर्वी आम्ही विविध पैलूंचा विचार करू. तो अजूनही प्रस्तावाच्या टप्प्यात आहे. यापूर्वी, समुद्रकिनाऱ्याच्या पर्यटनाला प्रोत्साहन देण्यासाठी, राज्य सरकारने ओडिशा पर्यटन विकास महामंडळाद्वारे (OTDC) सुरुवातीला पुरी ते कोणार्क पर्यंतच्या समुद्रकिनाऱ्यावर शॅक्स उभारण्यासाठी निविदा मागवल्या होत्या.