Asia Cup 2025: आशिया चषकातील सुपर-4 फेरीचे सामने निश्चित, भारत 'या' संघांविरुद्ध भिडणार; संपूर्ण वेळापत्रक पाहा

Asia Cup 2025 match schedule

आशिया कप २०२५ क्रिकेट स्पर्धेत रोमांचक सामने पाहायला मिळत आहेत. श्रीलंकेच्या क्रिकेट संघाने अफगाणिस्तानचा ६ विकेट्सनी पराभव करत सुपर ४ फेरीत एन्ट्री घेतली. अफगाणिस्तानने प्रथम फलंदाजी करताना १६९ धावांचे आव्हान दिले होते, परंतु श्रीलंकेच्या फलंदाजांनी दमदार खेळ करत हे लक्ष्य सहज गाठले. श्रीलंकेने गट फेरीतील सर्व तीन सामने जिंकत आपले वर्चस्व सिद्ध केले आहे.

कुसल मेंडिसची धडाकेबाज खेळी

श्रीलंकेच्या विजयात कुसल मेंडिस हा मुख्य शिलेदार ठरला. त्याने ५२ चेंडूत १० चौकारांसह ७४ धावा करत संघाला भक्कम पाया दिला. त्याला कुसल परेराने (२८ धावा) चांगली साथ दिली. शेवटी, कामिंदू मेंडिसने फक्त १३ चेंडूत २६ धावांची खेळी करत विजयावर शिक्कामोर्तब केले.

सुपर ४ चे चार संघ निश्चित

गट अ मधून भारत आणि पाकिस्तानने तर गट ब मधून श्रीलंका आणि बांगलादेशने सुपर ४ मध्ये प्रवेश मिळवला आहे. त्यामुळे या चारही दिग्गज संघांमध्ये उपांत्यपूर्व फेरीसाठी चुरशीची लढत रंगणार आहे. सुपर ४ पॉइंट टेबलमध्ये अव्वल दोन स्थान मिळवणारे संघ अंतिम फेरीत दाखल होतील.

भारत-पाकिस्तान सामना कधी?

भारतीय क्रिकेट संघ सुपर ४ मधील आपला पहिला सामना २१ सप्टेंबर रोजी प्रतिस्पर्धी पाकिस्तानविरुद्ध खेळेल. त्यानंतर २४ सप्टेंबरला भारताचा सामना बांगलादेशविरुद्ध आणि २६ सप्टेंबरला श्रीलंकेविरुद्ध होणार आहे. या सामन्यांकडे क्रिकेटप्रेमींच्या नजरा लागलेल्या आहेत.

सुपर ४ चे संपूर्ण वेळापत्रक

• बांगलादेश विरुद्ध श्रीलंका – २० सप्टेंबर

• भारत विरुद्ध पाकिस्तान – २१ सप्टेंबर

• पाकिस्तान विरुद्ध श्रीलंका – २३ सप्टेंबर

• बांगलादेश विरुद्ध भारत – २४ सप्टेंबर

• बांगलादेश विरुद्ध पाकिस्तान – २५ सप्टेंबर

• भारत विरुद्ध श्रीलंका – २६ सप्टेंबर