Team India Record: आशिया कप 2025 ची 9 सप्टेंबरपासून दणक्यात सुरुवात होणार आहे. यंदा ही प्रतिष्ठित स्पर्धा टी-20 फॉरमॅटमध्ये होणार असल्याने प्रत्येक सामन्यात रोमांच आणि उत्कंठा शिगेला पोहोचली आहे. यंदा ही स्पर्धा यूएईमध्ये आयोजित करण्यात आली असून, सर्व सामने अबू धाबी येथील शेख जायेद स्टेडियम आणि दुबई इंटरनॅशनल क्रिकेट स्टेडियममध्ये खेळले जातील. भारतीय संघ जो ग्रुप-एचा भाग आहे, तो आपला पहिला सामना 10 सप्टेंबर रोजी यूएई संघाविरुद्ध खेळणार आहे.
ग्रुप स्टेजमध्ये भारतीय संघाला दोन्ही स्टेडियममध्ये सामने खेळायचे आहेत, त्यामुळे या ठिकाणी भारताचा आतापर्यंतचा रेकॉर्ड कसा आहे, याकडे सर्वांचे लक्ष लागले आहे. पहिला सामना ग्रुप-बी मधील अफगाणिस्तान आणि हाँगकाँग यांच्यात 9 सप्टेंबर रोजी होणार आहे. यानंतर भारतीय संघ आपल्या मोहिमेला सुरुवात करेल.
भारतीय संघाला ग्रुप-ए मध्ये आपले सुरुवातीचे दोन सामने दुबई इंटरनॅशनल क्रिकेट स्टेडियममध्ये खेळायचे आहेत. यात पहिला सामना 10 सप्टेंबरला यूएईविरुद्ध, तर दुसरा सामना 14 सप्टेंबरला पारंपरिक प्रतिस्पर्धी पाकिस्तानविरुद्ध होणार आहे. या स्टेडियममध्ये भारताच्या आतापर्यंतच्या रेकॉर्डबद्दल बोलायचे झाल्यास, संघाने येथे एकूण 9 सामने खेळले आहेत. यापैकी भारतीय संघाने 5 सामन्यांमध्ये विजय मिळवला असून 4 सामन्यांमध्ये त्यांना पराभवाचा सामना करावा लागला आहे.
या आकडेवारीवरुन असे दिसते की, दुबईच्या मैदानावर भारताची कामगिरी 50 टक्क्यांहून अधिक असली, तरी ती खूप प्रभावी नाही. हे मैदान मोठ्या बाउंड्रीसाठी आणि पडणाऱ्या दवबिंदूंमुळे (Dew) ओळखले जाते, ज्यामुळे दुसऱ्यांदा फलंदाजी करणाऱ्या संघाला फायदा होतो. भारताला या मैदानातील आव्हानांचा सामना करावा लागणार आहे.
दुसरीकडे, पाकिस्तानचा दुबईतील रेकॉर्ड खूपच चांगला आहे. त्यांनी या मैदानावर आतापर्यंत 32 सामने खेळले आहेत, त्यापैकी 18 मध्ये विजय मिळवला असून 14 मध्ये त्यांना पराभव पत्करावा लागला आहे. पाकिस्तानसाठी हे एक प्रकारे त्यांचे घरचे मैदानच बनले आहे, कारण त्यांनी येथे सर्वाधिक सामने खेळले आहेत. यामुळे 14 सप्टेंबरच्या सामन्यात पाकिस्तानला घरच्या मैदानासारखाच फायदा मिळू शकतो.
दुबईनंतर भारतीय संघाला अबू धाबीच्या शेख जायेद स्टेडियममध्ये आपला तिसरा ग्रुप स्टेजचा सामना 19 सप्टेंबर रोजी ओमानविरुद्ध खेळायचा आहे. भारताचा या मैदानावर रेकॉर्ड पाहिला तर तो 100 टक्के विजयाचा आहे. भारतीय संघाने येथे आतापर्यंत फक्त एकच सामना खेळला असून त्यात त्यांनी विजय मिळवला आहे. जरी हा रेकॉर्ड एकाच सामन्यावर आधारित असला, तरी तो संघासाठी सकारात्मक संकेत आहे.
दुसरीकडे मात्र, पाकिस्तानने या मैदानावर जास्त सामने खेळले आहेत. त्यांनी येथे एकूण 10 सामने खेळले आहेत, त्यापैकी 7 मध्ये विजय मिळवला आहे, तर फक्त 3 मध्ये त्यांना पराभव पत्करावा लागला आहे. याचा अर्थ, अबू धाबीमध्येही पाकिस्तानची कामगिरी मजबूत आहे.
आशिया कपचा हा टी-20 फॉरमॅट येत्या टी-20 विश्वचषकासाठी भारतीय संघासाठी एक महत्त्वाची तयारी मानली जात आहे. यूएईमधील उष्ण हवामान आणि खेळपट्ट्यांची स्थिती खेळाडूंची खरी परीक्षा घेणार आहे. येथे खेळपट्टी सुरुवातीला वेगवान गोलंदाजांसाठी अनुकूल असली तरी नंतर ती फिरकीपटूंना मदत करते.
याशिवाय, यूएईमध्ये मोठ्या संख्येने भारतीय चाहते असल्याने खेळाडूंना घरच्या मैदानासारखेच वातावरण मिळते. चाहत्यांचा मोठा पाठिंबा आणि स्टेडियममधील ऊर्जा खेळाडूंना उत्तम कामगिरी करण्यास प्रोत्साहित करते. भारतीय संघाला ग्रुप स्टेजमध्ये दोन मोठ्या सामन्यांना तोंड द्यावे लागणार आहे आणि या दोन्ही मैदानांवरील आकडेवारी पाहता, संघ कोणताही धोका पत्करु शकत नाही.
एकूणच, आशिया कप 2025 हा केवळ विजेतेपदाची स्पर्धा नसून, तो आगामी मोठ्या आंतरराष्ट्रीय स्पर्धांसाठी भारतीय संघाची तयारी तपासणारी एक महत्त्वाची चाचणी ठरणार आहे. खेळाडूंच्या कामगिरीवर कर्णधाराच्या नेतृत्वावर आणि मैदानांवरील रेकॉर्डवर सर्वांचे लक्ष असेल.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.