हायटेक कॅमेरे, रडार अन् सेन्सर्सने सज्ज होणार भारताची सीमा! अमित शाहांकडून स्मार्ट प्लॅन जाहीर; म्हणाले,"गरज पडल्यास घरात घुसून मारु"

Amit Shah Smart Border Model Plan: केंद्रीय गृहमंत्री अमित शाह यांनी देशाच्या सीमा सुरक्षेबाबत एक अत्यंत महत्त्वाचा आणि मोठा निर्णय जाहीर केला. भारताच्या सीमांना आता संपूर्णपणे 'स्मार्ट बॉर्डर' मॉडेलवर विकसित केले जाईल, असे संकेत त्यांनी दिले.

बीएसएफचे संस्थापक आणि पहिले सीमा रक्षक के. एफ. रुस्तमजी यांच्या स्मृतीप्रित्यर्थ आयोजित व्याख्यानात बोलताना अमित शाह म्हणाले की, भारत आता सीमांच्या सुरक्षेला पूर्णपणे अत्याधुनिक तंत्रज्ञानावर आधारित बनवण्याच्या दिशेने वेगाने काम करत आहे. विशेषतः पाकिस्तान आणि बांगलादेश या देशांना लागून असलेल्या सीमांवर हायटेक कॅमेरे, रडार, प्रगत सेन्सर्स, पाळत ठेवणारी उपकरणे आणि रिअल-टाइम मॉनिटरिंग सिस्टीम यांसारखी जागतिक दर्जाची सुरक्षा यंत्रणा उभारली जात आहे. याच वर्षात दोन्ही देशांच्या सीमांवर स्मार्ट फेन्सिंग आणि इंटिग्रेटेड बॉर्डर मॅनेजमेंट सिस्टीम मोठ्या प्रमाणावर सुरु करण्याचे सरकारचे उद्दिष्ट आहे.

या महत्त्वाकांक्षी प्रकल्पासाठी आवश्यक असलेल्या जमीन वाटपाचे कामही अत्यंत वेगाने सुरु आहे. या संदर्भात माहिती देताना गृहमंत्र्यांनी स्पष्ट केले की, पश्चिम बंगाल सरकारनेही या प्रकल्पासाठी आवश्यक असलेली जमीन उपलब्ध करुन दिली असून ती बीएसएफकडे सुपूर्द करण्यात आली. ही नवीन 'स्मार्ट' व्यवस्था लागू झाल्यानंतर सीमेवरील घुसखोरी, ड्रोनच्या माध्यमातून होणाऱ्या देशविरोधी कारवाया, जनावरांची तस्करी, अंमली पदार्थांची तस्करी आणि इतर कोणत्याही संशयास्पद हालचालींवर तात्काळ बारीक लक्ष ठेवणे शक्य होणार आहे.

यामुळे सुरक्षा यंत्रणांना रिअल-टाइम अलर्ट मिळतील, ज्यामुळे सीमा सुरक्षा पूर्वीपेक्षा अधिक मजबूत आणि प्रभावी होईल. या कार्यात पश्चिम बंगाल, आसाम आणि त्रिपुरा या राज्यांच्या सीमावर्ती भागात केंद्र आणि राज्य सरकारे मिळून सीमा सुरक्षा अधिक बळकट करत आहेत. जर या कामात कोणतीही अडचण आली, तर प्रशासन पूर्ण ताकदीने बीएसएफच्या पाठीशी उभे राहील, अशी ग्वाही त्यांनी दिली.

या महत्त्वपूर्ण कार्यक्रमात अमित शाह (Amit Shah) यांनी नक्षलवादाच्या मुद्द्यावरही सरकारची भूमिका अत्यंत स्पष्ट केली. ते म्हणाले की, गेल्या पाच दशकांपासून देशाला सतावणारी नक्षलवादाची समस्या आता पूर्णपणे संपुष्टात येण्याच्या मार्गावर आहे. भारत नक्षलमुक्त होण्याच्या दिशेने वेगाने पुढे सरकला असून आमच्या शूर जवानांनी हे करुन दाखवले आहे. कोणत्याही समस्येला केवळ नियंत्रणात ठेवणे हा सुरक्षेचा कायमस्वरुपी उपाय असू शकत नाही, तर ती समस्या मुळापासून उपटून टाकणे हीच खरी सुरक्षा नीती आहे, असे प्रतिपादन त्यांनी केले.

यावेळी त्यांनी शेजारील पाकिस्तानलाही (Pakistan) कडक शब्दांत इशारा दिला. भारताने नेहमीच दहशतवाद आणि घुसखोरीला चोख प्रत्युत्तर दिले. आम्ही पाकिस्तानला तिन्ही वेळा सडेतोड उत्तर दिले असून गरज पडल्यास त्यांच्या घरात घुसून कारवाई केली, अशी आठवण त्यांनी करुन दिली.

गृहमंत्री शाह यांनी पुढे स्पष्ट केले की, आगामी काळात बीएसएफवर आणखी मोठी जबाबदारी सोपवली जाणार आहे. सीमेपलीकडून होणाऱ्या अवैध कारवाया पूर्णपणे रोखण्यासाठी बीएसएफ आता स्थानिक प्रशासनासोबत मिळून काम करेल. विशेषतः भारत-बांगलादेश सीमेवरील घुसखोरी रोखण्यासाठी पटवारी पातळीपासून ते जिल्हा प्रशासनापर्यंत एक उत्तम समन्वय निर्माण केला जाईल.

आता बीएसएफचे काम केवळ घुसखोरांना पकडण्यापुरते किंवा त्यांना परत पाठवण्यापुरते मर्यादित राहणार नाही, तर सीमेपलीकडून होणारी बेकायदेशीर घुसखोरी मुळापासून कशी थांबवता येईल, या दिशेने ही यंत्रणा काम करणार आहे. तंत्रज्ञान आणि मानवी कौशल्याच्या या अद्भुत संगमामुळे भारताची सीमा आता अधिक अभेद्य होणार आहे.