जम्मू-काश्मीरमध्ये 2 चकमकीत 4 दहशतवादी ठार

जम्मू-काश्मीरमध्ये शनिवारी शोपियान व पुलवामामध्ये पोलिस आणि दहशतवादी यांच्यात झालेल्या चकमकीत चार दहशतवादी ठार झाले. जम्मू आणि काश्मीर पोलिसांच्या माहितीनुसार, शोपियानमध्ये मारले गेलेले दहशतवादी लष्कर-ए-तैयबा (एलईटी) चे होते, तर पुलवामामध्ये मारले गेलेल्यांची ओळख अद्याप पटलेली नाही.

एलईटीच्या दोन दहशतवाद्यांची (Terrorist) ओळख पटली आहे. दहशतवादी सजाद अहमद चक हा ब्रारीपोरा, शोपियानचा रहिवासी होता, तर राजा बासित याकूब हा पुलवामा (Pulwama) येथील अचन लिटरमचा रहिवासी होता. "दोन्ही दहशतवादी एलईटीशी संबंधित होते. तरुणांना दहशतवादी गटात भरती करण्यात चकचा हात होता. त्यांच्याकडून शस्त्रे आणि दारूगोळा जप्त करण्यात आला," असे एका पोलिस अधिकाऱ्याने सांगितले.

दुसरी चकमक पुलवामा जिल्ह्यातील त्राल भागातील हरदुमीर येथे झाली. या चकमकीत दोन अज्ञात अतिरेकी ठार झाले. शुक्रवारी, सुरक्षा दलांनी काश्मीरच्या (Kashmir) अनंतनाग जिल्ह्यात हिजबुल मुजाहिद्दीनच्या एका दहशतवाद्याला ठार केले. तो पोलीस कर्मचारी व नागरिकांच्या हत्येत सामील होता. जम्मू-काश्मीरमधील (Jammu-Kashmir) बडगाममध्ये एलईटी दहशतवाद्यांचे सहकारी असलेल्या दोन लोकांना अटक करण्यात आली आहे.