Vinod Naik : आपल्या जादूई हातानी विविध रंगढंगाची चित्रे रेखाटणारा अवलीया चित्रकार

आपल्या जादूई हातानी विविध रंगढंगाची चित्रे रेखाटणारा अवलीया चित्रकार विनोद नाईक हे विद्यार्थीप्रिय शिक्षक आहेत. ते कवीदेखील आहेत. विनोद नाईक हे कुर्टी फोंडा येथील रहिवासी. त्यांचे मुळ गाव कुंभारजुवा. तिसवाडी येथे गावातील शाळेत त्यांचे प्राथमिक शिक्षण झाले. सिंधूनगर, कुर्टी येथे स्थलांतरीत झाल्यावर त्यांचे माध्यमिक शिक्षण कवळेच्या सरस्वती हायस्कूलमध्ये झाले. पुढे त्यांनी पणजीच्य आर्ट कॉलेजमध्ये कलेची पदवी संपादन केली व ते कलाशिक्षक बनले. त्यांच्या चित्रकला ज्ञानाचा फायदा नि;संशयपणे मुलांना झालेला असेल. सरकारी हायस्कूल धावशिरे, उसगाव येथे सध्या ते कला-शिक्षक म्हणून कार्य करत आहेत.

कॅनव्हासवर निसर्गचित्र, व्यक्तीचित्रे, समकालीन मॉडर्न आर्ट, तसेच तऱ्हेतऱ्हेची चित्रे काढण्यात ते तरबेज आहेत. अनेकांची पोर्ट्रेट त्यांनी काढलेली आहेत. त्यांच्या निसर्ग चित्रांमधून हुबेहुब निसर्ग आपल्यासमोर प्रत्यक्ष उभा झालेला असतो. ते एक चांगले चित्रकार आहेतच पण त्याचबरोबर ते एक उत्कृष्ट कवी आहेत. त्यांचे जवळजवळ 15 कवितासंग्रह आणि दोन कथासंग्रह देखील प्रकाशित झाले आहेत.

राज्यात ठिकठिकाणी होणाऱ्या कविता वाचनाच्या कार्यक्रमात त्यांनी आपली कविता सादर केल्या आहेत. विनोद नाईक यांच्या साहित्याला अनेक मानाचे पुरस्कार लाभलेले आहेत. गोमंतक साहित्य सेवक मंडळ पणजी, प्रागतिक विचार मंच- गोवाचे या सस्थांचे ते सदस्य आहेत. त्यांच्या मनमिळावू स्वभावामुळे त्यांनी मोठा मित्रपरिवार जोडलेला आहे.