गोव्यात 16 जुलैपासून वाद्यसंगीत संमेलन

कॅमरून क्रिएशन’चे स्व. मनोहर मडगावकर स्मृती 14 वे वाद्यसंगीत संमेलन, यंदा रविवार 16 जुलै रोजी संध्याकाळी 4 वाजल्यापासून, बार्देश मधील पालये- उसकईच्या कॅमरून किंगडम हॉलमध्ये रंगणार आहे. वाद्यसंगीताला वाहिलेले हे गोव्यातील एकमेव संमेलन आहे. वाद्यसंगीताची साधना करणाऱ्या होतकरू कलाकारांना या संमेलनाद्वारे व्यासपीठ मिळते.

या संमेलनात नामवंत संतुरवादक डॉ. नरेश मडगावकर यांचे सेक्साफोनवर शास्त्रीय वादन ऐकण्याची संधी रसिकांना लाभणार आहे. त्यांचे शिष्य श्रद्धेय मयेकर संतूरवादन करतील. बाल कलाकार आदित्य मडगावकर हा शास्त्रीय गिटारवादन सादर करणार आहे. शिवाय या संमेलनात सृजन भटकुर्से यांचे हार्मोनियम सोलोवादन व रघुवीर फडते यांचे सतारवादन होईल. डॉ. राजेश भटकुर्से, डॉ.सतीश मडगावकर, मृणाल परब, महेंद्र च्यारी हे तबलासाथ देतील. नेहा उपाध्ये यांचे सूत्रसंचालन या संमेलनात असेल. या संमेलनातील कार्यक्रम सर्वांसाठी खुले आहेत.

या वाद्यसंगीत संमेलनात संगीत क्षेत्रातील योगदानाबद्दल ज्येष्ठ तबलावादक नितीन कोरगावकर याना मनोहर मडगावकर स्मृती जीवनगौरव पुरस्कार,पर्वरीच्या ज्ञान विकास विद्यालयाचे प्रशासक गौतम खरंगटे यांना सामाजिक क्षेत्रातील योगदानाबद्दल मनोहर मडगावकर स्मृती समाजभूषण पुरस्कार व किशोर नाईक गावकर यांना पत्रकारितेतील योगदानाबद्दल, मनोहर मडगावकर  स्मृती समाजरत्न पुरस्कार प्रदान करण्यात येतील.