डिसेंबर २०२५ हा भारतीय ऑटोमोबाईल बाजारासाठी अत्यंत महत्त्वाचा ठरणार आहे. वर्षाच्या शेवटी अनेक मोठ्या कंपन्या त्यांच्या महत्वाच्या मॉडेल्सचे अनावरण करणार आहेत. इलेक्ट्रिक एसयूव्ही, टर्बो-पेट्रोल इंजिन कार, नेक्स्ट-जेनरेशन एसयूव्ही आणि लक्झरी कन्व्हर्टेबल्स – प्रत्येक श्रेणीमध्ये नवे पर्याय उपलब्ध होणार आहेत. त्यामुळे नवीन वर्षाआधी कार खरेदी करण्याचा विचार करणाऱ्या ग्राहकांसाठी हा महिना उत्साहवर्धक ठरणार आहे.
मारुती सुझुकी त्यांच्या पहिल्यावहिल्या इलेक्ट्रिक एसयूव्ही “ई-विटारा”ची अधिकृत किंमत २ डिसेंबर २०२५ रोजी जाहीर करणार आहे. तिच्या लाँचिंगची जोरदार चर्चा असून, सर्वाधिक लक्ष वेधत आहे ते तिच्या ड्रायव्हिंग रेंजकडे. कंपनीने काही व्हेरियंट्ससाठी तब्बल ५०० किमीपर्यंतची रेंज देण्याचा दावा केला आहे. मारुतीच्या इलेक्ट्रिक प्रवासातील हा महत्वाचा टप्पा मानला जात आहे.
९ डिसेंबर २०२५ रोजी टाटा मोटर्स त्यांच्या लोकप्रिय आणि दमदार एसयूव्ही “हॅरियर”च्या पेट्रोल व्हर्जनचे लाँच करणार आहेत. १.५-लिटर टर्बोचार्ज्ड पेट्रोल इंजिनसह येणारे हे नवे मॉडेल, आतापर्यंत केवळ डिझेलमध्ये उपलब्ध असलेल्या हॅरियरला अधिक स्पर्धात्मक बनवणार आहे. पेट्रोल मॉडेलच्या आगमनामुळे ग्राहकांना आता अधिक बजेट-फ्रेंडली आणि कस्टमाइज्ड पर्याय मिळणार आहेत.
हॅरियरसोबतच ९ डिसेंबर रोजी टाटा “सफारी पेट्रोल” देखील लाँच करणार आहे. यात तोच १.५-लिटर टर्बो-पेट्रोल इंजिन वापरण्यात येणार आहे. दीर्घकाळापासून डिझेल व्हर्जनमध्ये चालणाऱ्या या लोकप्रिय फॅमिली एसयूव्हीमध्ये पेट्रोल पर्याय उपलब्ध झाल्यामुळे तिची बाजारपेठ आणखी विस्तारित होणार आहे. पेट्रोल एसयूव्ही शोधणाऱ्यांसाठी हे एक मोठे आकर्षण ठरू शकते.
किआ मोटर्स त्यांची दुसऱ्या पिढीतील “सेल्टोस” १० डिसेंबर २०२५ रोजी जागतिक स्तरावर लाँच करणार आहे. नवीन सेल्टोसमध्ये प्रीमियम इंटीरियर, अपडेटेड डिझाइन आणि अनेक आधुनिक तंत्रज्ञान वैशिष्ट्यांची अपेक्षा आहे. इंजिन पर्याय सध्या उपलब्ध असलेल्या पेट्रोल आणि डिझेलप्रमाणेच राहण्याची शक्यता असून, भविष्यात हायब्रिड व्हर्जनही सादर करण्याचा विचार कंपनी करत आहे.
लक्झरी कार प्रेमींसाठी आनंदाची बातमी म्हणजे मिनी कूपर कन्व्हर्टेबल या डिसेंबरमध्ये भारतीय बाजारात दाखल होण्याची शक्यता आहे. कूपर एस प्रकारात येणारी ही कार २.०-लिटर टर्बो-पेट्रोल इंजिनसह येणार आहे. तिचा इलेक्ट्रिक सॉफ्ट-टॉप फक्त १८ सेकंदात उघडतो, हे तिचे मुख्य आकर्षण मानले जात आहे. या मॉडेलसाठी बुकिंग आधीच सुरू झाली असून ग्राहकांमध्ये प्रचंड उत्सुकता आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.