नवीन आर्थिक वर्षात क्रिप्टो गुंतवणूकदारांना बसणार कराचा फटका

मार्च महिना संपत आला असून 1 एप्रिलपासून नवीन आर्थिक वर्ष सुरू होत आहे. अशा परिस्थितीत महिन्याची सुरुवात मोठ्या बदलांसह होणार आहे. यामध्ये एकीकडे क्रिप्टोमध्ये गुंतवणूक करणाऱ्यांना कराचा फटका बसणार आहे, तर दुसरीकडे औषधांच्या किमती वाढणार आहेत.

क्रिप्टोमधून कमाईवर कर
नवीन आर्थिक वर्षाच्या पहिल्या दिवसापासून क्रिप्टोकरन्सीवर (Cryptocurrency) कर लावण्यात येणार आहे. 2022-23 च्या अर्थसंकल्पात, अर्थमंत्री निर्मला सीतारामन यांनी सर्व आभासी डिजिटल मालमत्ता किंवा क्रिप्टो मालमत्तांवर 30 टक्के कर लावण्याची घोषणा केली होती. या अंतर्गत, जर गुंतवणूकदाराला क्रिप्टो मालमत्ता विकून फायदा झाला तर त्याला सरकारला कर भरावा लागेल. यासह, जेव्हा जेव्हा क्रिप्टो मालमत्ता विकली जाते तेव्हा त्याच्या विक्रीच्या एक टक्के दराने TDS कापला जाईल.

औषधांच्या किमती वाढणार
नव्या आर्थिक वर्षाच्या सुरुवातीपासूनच सर्वसामान्यांसाठी औषधांवर (Medicines) होणारा खर्च वाढणार आहे. महागाईमुळे हैराण झालेल्यांसाठी 1 एप्रिलपासून औषधे घेणे महाग होणार आहे. अहवालानुसार, 800 जीवनावश्यक औषधांच्या किमती 10.7 टक्क्यांनी वाढणार आहेत. यामध्ये पॅरासिटामॉल या तापासाठी मूलभूत औषधाचा समावेश आहे. नॅशनल फार्मास्युटिकल प्राइसिंग अथॉरिटी (NPPA) ने या औषधांच्या घाऊक किंमत निर्देशांकात बदल करण्यास मान्यता दिली आहे.

गॅस सिलिंडरच्या किमतींमध्ये वाढ होण्याची शक्यता
दर महिन्याप्रमाणे एप्रिलच्या पहिल्या दिवशीही गॅस सिलेंडरच्या किमतीत बदल होऊ शकतो. देशात पेट्रोल (Petrol) आणि डिझेलच्या किमती दिवसेंदिवस वाढत आहेत. एप्रिलमध्ये पुन्हा एकदा गॅस सिलिंडरच्या दरात वाढ होण्याची शक्यता आहे. अलीकडेच एलपीजी सिलिंडरच्या दरात 50 रुपयांनी वाढ झाली आहे.