BSE Sensex Market Cap: नवीन वर्षाच्या सुरुवातीच्या दिवसांमध्ये म्हणजेच 2024 मध्ये गुंतवणूकदारांनी शेअर बाजारातून मोठी कमाई केली. गुंतवणूकदारांनी अवघ्या चार दिवसांत बाजारातून 6.88 लाख कोटी रुपये कमावले. यामुळे बॉम्बे स्टॉक एक्स्चेंज (BSE) वर सूचीबद्ध कंपन्यांचे एकूण मार्केट कॅप 373 लाख कोटी रुपयांवर पोहोचले आहे. शुक्रवार, 12 जानेवारी रोजी सेन्सेक्स 847 अंकांच्या वाढीसह 72,568 वर बंद झाला.
दरम्यान, शुक्रवारी (12 जानेवारी रोजी) TCS आणि Infosys चे निकाल सकारात्मक होते, ज्यामुळे IT निर्देशांकात प्रचंड वाढ झाली. इन्फोसिस 7.93 टक्क्यांनी, तर टाटा समूहाची कंपनी टीसीएसमध्ये 3.94 टक्क्यांनी वाढ नोंदवली गेली. याशिवाय टेक महिंद्रा, एचसीएल टेक, विप्रो या कंपन्यांच्या समभागांमध्येही लक्षणीय वाढ दिसून आली. यामुळे बीएसईचे मार्केट कॅप 3,73,29,676.27 कोटी रुपयांवर पोहोचले.
आयटी क्षेत्रातील बड्या कंपन्यांच्या सकारात्मक निकालाने शेअर बाजारात तेजी पाहायला मिळाली. याशिवाय सार्वजनिक क्षेत्रातील बँकांनीही चांगली कामगिरी केली. या आठवड्यात गुंतवणूकदारांच्या संपत्तीत लक्षणीय वाढ झाली आहे. यासोबतच शेअर बाजारानेही आतापर्यंतची सर्वोच्च पातळी गाठली. या आठवड्यात बीएसईवर एकूण 2,112 शेअर्स वाढले, तर 1742 घसरले. याशिवाय, 88 शेअर्समध्ये कोणताही बदल झाला नाही. बीएसई स्मॉलकॅप 0.41 टक्के आणि मिडकॅप 0.36 टक्क्यांनी वधारले.
शुक्रवारी (12 जानेवारी रोजी) आयटी समभागांमध्ये मोठ्या प्रमाणात खरेदी झाल्यामुळे सेन्सेक्स आणि निफ्टीने विक्रमी उच्चांक गाठला. सेन्सेक्स 800 हून अधिक अंकांनी वाढला, तर निफ्टीही 247 अंकांच्या वाढीसह बंद झाला. सेन्सेक्स आता 73 हजार आणि निफ्टी 22,000 चा आकडा गाठण्याच्या अगदी जवळ आला आहे.
मोतीलाल ओसवाल फायनान्शिअल सर्व्हिसेस लिमिटेडचे रिटेल रिसर्च हेड सिद्धार्थ खेमका म्हणाले की, “टीसीएस आणि इन्फोसिसने त्यांच्या अपेक्षेपेक्षा चांगली वाढ नोंदवली.''
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
