तेलाचा भडका! मार्चमध्ये महागाईने गाठला नवा उच्चांक

खाद्यपदार्थ आणि तेलाच्या महागाईचा परिणाम आता महागाईच्या आकडेवारीवर दिसून येत आहे. किरकोळ महागाईचा दर मार्चमध्ये 6.95 टक्क्यांवर पोहोचला असून, याने आरबीआयचे 6 टक्क्यांचे लक्ष्य ओलांडले आहे. खाद्यपदार्थ आणि पेट्रोल-डिझेलच्या किमतीमुळे ही किरकोळ महागाई वाढली आहे. पेट्रोल (Petrol) आणि डिझेलच्या (Diesel) दरात प्रत्येकी 10 रुपयांनी वाढ झाल्यानंतर मालवाहतूक 15 ते 20 टक्क्यांनी महाग झाल्याचे वाहतूकदारांचे म्हणणे आहे. अशा स्थितीत घाऊक बाजारात भाजीपाला आणि फळांच्या दरातही मोठी वाढ झाली आहे.

दरम्यान, चलनवाढीचा दर फेब्रुवारीमध्ये 5.85 टक्क्यांवरुन मार्चमध्ये 7.68 टक्क्यांवर पोहोचला आहे. किरकोळ चलनवाढीचा दर जानेवारी 2022 मध्ये 6.01% होता, ग्राहक किंमत निर्देशांक (CPI) च्या आधारे मोजल्या गेलेल्या महागाईने रिझर्व्ह बँकेचे (Reserve Bank) 6 टक्के लक्ष्य मागे ठेवले.