Commercial LPG Cylinder Price Hike: ऑक्टोबर महिना सुरु होताच तेल कंपन्यांनी ग्राहकांना मोठा धक्का दिला आहे. आजपासून, कमर्शियल गॅस सिलिंडरच्या दरात 209 रुपयांनी (Commercial LPG Cylinder Price Hike) वाढ झाली आहे. नवीन दर रविवारपासून म्हणजेच 1 ऑक्टोबर 2023 पासून लागू झाले आहेत. या वाढीनंतर राजधानी दिल्लीत 19 किलोचा एलपीजी सिलिंडर 1731.50 रुपयांना विकला जात आहे.
अवघ्या महिन्याभरापूर्वी सरकारने घरगुती गॅस सिलिंडरच्या किंमतीत 200 रुपयांनी मोठी कपात केली होती. यानंतर 1 ऑक्टोबर रोजी घरगुती एलपीजीच्या किमतीत कोणताही बदल झालेला नाही. तो जुन्याच दरावर कायम आहे. चार महानगरांमध्ये, 14.20 किलोचा घरगुती गॅस सिलिंडर दिल्लीत 903 रुपये, कोलकात्यात 929 रुपये, मुंबईत 902.50 रुपये आणि चेन्नईमध्ये 918.50 रुपयांना उपलब्ध आहे.
इतर महानगरांबद्दल बोलायचे झाल्यास, कोलकातामध्ये एलपीजी सिलिंडरची किंमत 203.50 रुपयांनी वाढली आहे. इथे कमर्शियल गॅस सिलिंडर आता 1,636.00 रुपयांऐवजी 1,839.50 रुपयांना मिळणार आहे. मुंबईत 19 किलोच्या कमर्शियल एलपीजी गॅस सिलिंडरच्या किंमतीत 204 रुपयांची वाढ नोंदवण्यात आली असून त्याची किंमत 1,482 रुपयांवरुन 1,684 रुपये प्रति सिलेंडर झाली आहे. तर चेन्नईमध्ये कमर्शियल गॅस सिलिंडरची किंमत 203 रुपयांनी वाढली असून येथे 1,695 रुपयांवरुन 1898 रुपयांपर्यंत वाढ झाली आहे.
सप्टेंबर 2023 मध्ये तेल कंपन्यांनी घरगुती तसेच कमर्शियल गॅस सिलिंडरच्या किंमतीत मोठी कपात केली होती. गेल्या महिन्यात 19 किलोच्या सिलिंडरची किंमत 158 रुपये झाली होती. यानंतर राजधानी दिल्लीत त्याची किंमत 1,522 रुपयांवर पोहोचली होती. कमर्शियल गॅस सिलिंडरच्या किमतीत वाढ झाल्याचा परिणाम असा होऊ शकतो की, हॉटेल रेस्टॉरंटमध्ये खाणे-पिणे महाग होऊ शकते, कारण फक्त कमर्शियल गॅस सिलिंडरचा वापर केला जातो.
30 ऑगस्ट रोजीच सरकारने 14.2 किलोच्या एलपीजी सिलिंडरची किंमत 200 रुपयांनी कमी करण्याचा निर्णय घेत सर्वसामान्यांना महागाईपासून मोठा दिलासा दिला होता. त्यानंतर राजधानी दिल्लीत 14.2 किलो एलपीजी सिलेंडरची किंमत 1103 रुपयांवरून 903 रुपयांवर आली आहे. इतर अनेक शहरांमध्ये सिलिंडरचे दर 200 रुपयांनी कमी झाले आहेत. याशिवाय, उज्ज्वला योजनेंतर्गत उपलब्ध एलपीजी गॅस सबसिडी देखील 400 रुपये करण्यात आली आहे. या योजनेतर्गंत उपलब्ध असलेल्या एलपीजी सिलिंडरची किंमत 703 रुपयांपर्यंत खाली आली आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.