केपे: येथील ‘भवानी गोल्ड शॉप’मधून गेल्या दोन महिन्यांपूर्वी सुमारे ३.७८ लाख रुपयांचे सोने पळवून नेले होते. या प्रकरणी केपे पोलिसांनी जया सचिन बडगुजर या महिलेला पुणे येथून अटक करण्यात यश मिळवले आहे.

पोलिसांनी दिलेल्या माहितीनुसार, दोन महिन्यांपूर्वी केपे बाजारातील ‘भवानी गोल्ड शॉप’मध्ये तीन महिलांनी सोने खरेदी करण्याचे बहाणे करून काही सोन्याच्या वस्तू दाखवायला लावल्या होत्या व यावेळी शिताफीने काही सोन्याच्या वस्तू घेऊन ही महिला पसार झाली होती. सीसीटीव्ही व्हिडिओमध्ये महिलांनी या वस्तू चोरून नेल्याचे स्पष्टपणे दिसत होते व याचाच आधार घेऊन केपे पोलिसांनी तापसकामाला सुरवात केली होती.

या चोरीप्रकरणातील संशयित पुणे येथे असल्याचा सुगावा लागताच दक्षिण गोवा पोलिस अधिक्षक सिंग यांच्या मार्गदर्शनाखाली केपे पोलिस स्थानकाचे पोलिस उपनिरीक्षक दिगंबर बोंद्रे, पोलिस कॉन्स्टेबल अमिर नाईक, प्रणय नाईक, महिला पोलिस वेना दातेकर व दीक्षा झोरे यांनी पुणे येथून जया सचिन बडगुजर या महिलेला अटक केली असून आणखी दोघा महिलांचा केपे पोलिस शोध घेत आहेत.