डिचोली: ‘श्री लईराई माता की जय’ असा जयघोष आणि वाजतगाजत देवीच्या कळसाने अखेर सायंकाळी मंदिरात प्रवेश केला. सायंकाळपर्यंत शिरगावात भाविकांची गर्दी नियंत्रणात होती. मात्र, देवी मंदिरात प्रवेश करतेवेळी श्री लईराई मंदिर परिसरात भाविकांची अभूतपूर्व गर्दी उसळली होती.

भाविकांना मंदिरात प्रवेश रोखल्याने देवीच्या कळसाचे सुरळीतपणे मंदिरात आगमन झाले. जत्रेनंतर चार दिवसांपासून सुरू असलेल्या कौलोत्सवाचीही परंपरेप्रमाणे सांगता झाली. देवी मंदिरात प्रवेश करतेवेळी कोणतीही अनुचित घटना घडली नाही. गेल्या शनिवारपासून कौलोत्सवाला प्रारंभ झाला होता. आज सायंकाळी साडेसात वाजण्याच्या सुमारास देवीचे मंदिरात आगमन झाले. मध्यंतरी ‘कोरोना’ काळात दोन वर्षे वगळता, श्री लईराई जत्रोत्सवाच्या इतिहासात प्रथमच भाविकांना मंदिरात प्रवेश नाकारण्यात आला होता. जत्रेच्या उत्तररात्री झालेल्या चेंगराचेंगरीच्या पार्श्वभूमीवर देवी मंदिरात प्रवेश करतेवेळी भाविकांना मंदिरात प्रवेश रोखण्यात आला होता. प्रशासन आणि देवस्थान समितीने तसा निर्णय घेतला होता.