सासष्टी: रवींद्र भवन मडगाव दुरुस्तीसाठी अनिश्र्चित काळासाठी बंद ठेवण्याचा निर्णय झाल्याने तियात्र कलाकारांना मोठा फटका बसला आहे. यंदाच्या पावसाळ्यात नवीन तियात्रांसाठी त्यांनी तयारी केली होती व त्यासाठी भरपूर खर्चही केला होता. आज तियात्रिस्त आणि रवींद्र भवन मडगावचे अध्यक्ष राजेंद्र तालक यांच्यामध्ये बैठक झाली. बैठकीनंतर तियात्रिस्तांनी सभागृहाची पाहणी केली. या बैठकीत त्यांनी नुकसान भरपाई देण्याची मागणी केली.

रवींद्र भवनला नुकसान भरपाई देण्याचा अधिकार नाही. त्यांनी त्यासाठी गोवा तियात्र अकादमीशी संपर्क साधावा. यावेळी अकादमीचे अध्यक्ष ॲंन्थनी बार्बोझा उपस्थित होते. बार्बोझा यांनी नुकसान भरपाईची मागणी घेऊन मुख्यमंत्र्यांची भेट घेण्याचे आश्वासन त्यांना दिले आहे.

तियात्रिस्तांच्या आणखी काही मागण्या असतील तर त्या जाणून घेण्यासाठी आपण त्यांच्याशी चर्चा केली, असे तालक यांनी सांगितले. आपण व मडगावचे आमदार दिगंबर कामत मुख्यमंत्र्यांची भेट घेऊन त्यांना दुरुस्तीचे काम युद्धपातळीवर करण्याची विनंती करणार आहोत, असेही तालक यांनी सांगितले.