पणजी: राजधानी पणजीत वेगवेगळ्या भागांमधून लोकं कामासाठी तसेच शिक्षणासाठी येत असतात आणि या लोकांची काही गैरसोय होऊ नये ,म्हणून शहरात जागोजागी स्ट्रीटलाईट्स असणं महत्वाचं आहे. येणाऱ्या लोकांना सुरक्षित वाटावं, फिरताना अडथळा निर्माण होऊ नये म्हणून या लाईट्स महत्वाच्या आहेत, मात्र सध्या पणजी शहरातील या लाईट्स रात्रीच्यावेळी बंद तर दिवसभर मात्र सुरूच दिसतायत. यामुळे सरकार केवळ विनाकारण कोट्यवधी रुपये खर्च करतंय असा आरोप स्थानिकांनी केलाय.

स्मार्टसिटीच्या नावाखाली सरकार फक्त लाख आणि कोटी रुपये खर्च करतंय. शहरात आज जागोजागी स्ट्रीटलाईट्स आहेत मात्र त्या कधीच रात्रीच्यावेळी पेटत नाहीत असा आरोप स्थानिकांनी व्यक्त केलाय. सरकारला याबद्दल काहीही पडून गेलेलं नाही, मंत्र्यांनी एकदा शहरात फेरफटका मारून बघावं, एसीच्या गाडीत बसून काहीही समजत नाही अशी संतप्त प्रतिक्रिया स्थानिकांनी व्यक्त केली आहे.

मिरामार,दोना पावला अशा ठिकाणी लहान मुलं, महिला फिरतात त्यांची ये-जा सुरु असते, पण जर का लाईस्ट नसतील तर त्यांचीच सुरक्षा कशी व्हायची अशी चिंता स्थानिकांनी व्यक्त केली आहे. रात्रीच्या अंधारात बाहेर निघणं देखील मुश्किल झालं असल्याचं एक स्थानिक महिला म्हणाली आहे.