कळंगुट: जम्मू काश्मीरच्या पहलगाम येथे २२ एप्रिलला निष्पाप पर्यटकांवर दहशतवाद्यांकडून झालेला हल्ला हा अत्यंत भ्याड, निर्दयी तसेच मानवतेला काळिमा फासणारा आहे. अशा हल्ल्यास सरकारकडून कठोरपणे उत्तर देणे आवश्यक असल्याचे शिवोलीतील समर्थन संघटनेचे उपाध्यक्ष नितीन आगरवाडेकर यांनी सांगितले. पहलगाम येथे पर्यटकांवर झालेल्या भ्याड हल्ल्याच्या निषेधार्थ येथील स्वामी समर्थ मठ तसेच समर्थन संघटनेतर्फे आयोजित निषेध सभेत आगरवाडेकर बोलत होते. यावेळी समर्थनचे सचिव यदुवीर सीमेपुरुषकर, कांचन पेडणेकर, रितेश वारखंडकर, मांद्रेकर आदी मान्यवर उपस्थित होते.

पुलवामानंतर काश्मीरच्या पहलगाम येथे झालेला हल्ला हा पूर्व नियोजीत होता. यावेळी केवळ हिंदू धर्मियांनाच दहशतवाद्यांनी लक्ष केले आहे. त्यामुळे दहशतीला धर्म असतो ही गोष्ट सिद्ध होत असल्याचे समर्थन संघटनेचे सचिव यदुवीर सीमेपुरुषकर यांनी सांगितले. या निषेध सभेत महिलांचा मोठ्या प्रमाणात सहभाग होता. यावेळी समर्थन संघटनेच्या कार्यकर्त्यांकडून पाकिस्तानचा निषेध करणाऱ्या घोषणा देत पाकिस्तान पुरस्कृत दहशतवाद्यांची चित्रे असलेला बॅनर जाळण्यात आला.