राज्यात गेल्या काही दिवसांपासून कॅश फॉर जॉब प्रकरणावरुन जोरदार राजकीय घमासान पाहायला मिळत आहे. रोज-रोज होत असलेल्या खुलाशांमुळे सावंत सरकारच्या अडचणी वाढतच चालल्या आहेत. सावंत सरकारमधील मंत्री, आमदारांची नावे समोर येवू लागल्याने विरोधकांनी आक्रमक पवित्रा घेतला आहे. यातच, मंगळवारी (19 नोव्हेंबर) राज्यातील विरोधकांची फातोर्डा येथे एक बैठक पार पडली. ज्यामध्ये फातोर्ड्याचे आमदार विजय सरदेसाई, विरोधी पक्षनेते युरी आलेमाव, व्हेंझी व्हिएगस, विरेश बोरकर यांच्यासह महत्वाच्या नेत्यांनी बैठकीला हजेरी लावली. या बैठकीत पंतप्रधान मोदींनी सरकारी नोकरी घोटाळ्याची दखल घ्यावी यासाठी पत्र लिहिण्याचं ठरलं. पंतप्रधानांनी या प्रकरणाकडे लक्ष द्यावे अशी मागणी यावेळी विरोधकांकडून करण्यात आली.