फोंडा: माणूस मद्याच्या नादी लागला की काय होईल आणि काय नाही, याचा भरवसा नाही. मदिरेच्या आहारी जाऊन कित्येक दुर्घटना घडल्या आहेत. असाच एक दुर्दैवी प्रकार कोडार-बेतोडा येथे घडला आहे. रात्री मद्यपान आणि चिकन मटणाचा बेत केला. मस्तपैकी जेवण बनवले, त्यापूर्वी दारूही ढोसली आणि क्षुल्लक कारणावरून बाचाबाची झाल्याने शेवटी मेव्हण्यानेच भावोजीचा खून केला.

ही घटना सोमवारी रात्री साडेनऊच्या दरम्यान घडली. कोडार बेतोडा येथील श्रीकांत उमयें कुटुंबीयांच्या बागायतीची देखभाल व राखणदारी करण्यासाठी मूळ झारखंड येथील मेहुणा आणि भावोजीला कामावर ठेवण्यात आले होते.

झाडांना पाणी सोडणे तसेच इतर कामाबरोबरच बागायतीची आणि गुरांची देखभाल करणे आदी कामासाठी मूळ झारखंड येथील डेव्हीड शिलास टोपो (वय ४०) व दीपक बोल्तास तिर्की (वय २७) या मेहुणा व भावोजीला बागायत मालकाने कामावर ठेवले होते.

चिकन भाताची थाळी तशीच...

रात्री या दोघांनी चिकन मटणाचा बेत केला होता. त्यापूर्वी दोघांनी यथेच्छ दारू ढोसली; पण दोघांत जेवणाच्या क्षुल्लक कारणावरून वाद निर्माण झाला त्यात डेव्हिड याने आपला भावोजी दीपकच्या गळ्यावर धारदार शस्त्राने वार केला. यावेळी जेवण वाढलेले ताट तसेच पडून होते

मृतदेह शवचिकित्सेसाठी इस्पितळात

1) आपल्या घरात दोघांचे जोरदार भांडण होत असल्याची माहिती बागायतीचे मालक श्रीकांत उमयें यांना मिळाल्यावर त्याबाबतची माहिती पोलिसांना दिली पोलिसांनी त्वरित घटनास्थळी धाव घेतली असता दीपक तिर्के रक्ताच्या थारोळ्यात पडलेला दिसला

2) संशयित खुनी डेव्हिड टोपो पळण्याच्या बेतात असताना पोलिसांनी त्याला ताब्यात घेतले.

3) दीपक तिर्के याचा मृतदेह शवचिकित्सेसाठी इस्पितळात पाठवण्यात आला असून फोंडा पोलिस स्थानकाचा ताबा असलेले निरीक्षक राघोबा गावडे उपअधीक्षक शिवराम वायंगणकर यांच्या मार्गदर्शनाखाली पुढील तपास करीत आहेत.