म्हापसा: भक्तांच्या हाकेला धावणारा राखणदार तसेच जागृत दैवत श्री देव बोडगेश्वर देवस्थानचा ९१वा महान जत्रोत्सव शुक्रवारी (२ जानेवारी) हजारो भाविकांच्या उपस्थितीत उत्साहात सुरू झाला. हा जत्रोत्सव गुरुवार, ८ जानेवारीपर्यंत चालणार आहे. या जत्रोत्सवाची आकर्षण असलेली मोठी फेरी सध्या लोकांचे लक्ष वेधत करत आहे.

जत्रोत्सवाच्या पूजेचे यजमानपद देवस्थान समितीचे अध्यक्ष अ‍ॅड. वामन पंडित यांनी सपत्नीक भूषविले. दु. १२ वा. देवाच्या चरणी श्रीफळ ठेवून व पुरोहितांनी गाऱ्हाणे घातल्यानंतर या जत्रोत्सवाला प्रारंभ झाला. यावेळी म्हापसा परिसरातील विविध देवस्थाने, विविध संस्था, पोलिस, अग्निशमन दल व पालिकेतर्फे श्रींच्या चरणी फळांचा प्रसाद अर्पण करण्यात आला. त्यानंतर महाप्रसाद झाला.

आरोग्यमंत्री विश्वजीत राणे, उपसभापती जोशुआ डिसोझा, जिल्हाधिकारी अंकित यादव, अतिरिक्त जिल्हाधिकारी पुंडलिक खोर्जुवेकर, उपजिल्हाधिकारी वर्षा परब, पोलिस उपअधीक्षक विल्सन डिसोझा, निरीक्षक नवीन देसाई, संजीत कांदोळकर, मार्लन डिसोझा, मामलेदार अनंत मळीक यांच्यासह विविध सरकारी अधिकारी, कर्मचारी, लोकप्रतिनिधींंनी दुपारपर्यंत श्रींचे दर्शन घेतले. शिवाय केंद्रीय मंत्री श्रीपाद नाईक, राज्यसभा खासदार सदानंद शेट तानावडे, आमदार जीत आरोलकर, भाजप प्रदेशाध्यक्ष दामू नाईक, नगराध्यक्षा प्रिया मिशाळ, उपनगराध्यक्ष प्रकाश भिवशेट, नगरसेवक, नगरसेविका यांनी देवदर्शन घेतले.