Leopard Spotted In Thivim

म्हापसा: थिवी येथे आज पुन्हा बिबट्याची दहशत दिसून आली. बिबट्याने एका बकरीवर हल्ला करून तिला ठार केल्याची घटना कान्सा-धनगरवाडा येथे घडली. बिबट्याचा वावर वाढल्याने नागरिकांमध्ये सध्या भीतीचे वातावरण निर्माण झाले आहे. ही घटना प्रस्तावित खासगी विद्यापीठ असलेल्या डोंगराच्या पायथ्याशी घडली. या ठिकाणी धनगर कुटुंब बकरी पालनाचा व्यवसाय करते. महिन्याभरात कान्सा परिसरातील ही दुसरी घटना आहे.

ही घटना शुक्रवारी (ता.१) दुपारी ३ च्या सुमारास उघडकीस आली. हा बिबटा पाण्याच्या डबक्याशेजारी एका बकरीवर हल्ला करून त्याच्या शरीराचे लचके तोडत होता. हा प्रकार वाड्यावरील एका मुलाने पाहिल्यानंतर त्याने इतरांना याची माहिती दिली. या डबक्याजवळ बिबट्याच्या पंज्याचे ठसे उमटले आहेत. या घटनेची माहिती मिळताच वन अधिकाऱ्यांनी शनिवारी घटनास्थळी पाहणी करून याठिकाणी पिंजरा बसविला आहे.