कळंगुट: पोर्तावाडा -शिवोली येथे शुक्रवारी सकाळी ६.३० च्या सुमारास बार्रेटो यांच्या घराच्या कंपाऊंड परिसरात एका बिबट्याचे दर्शन झाले. या घटनेमुळे परिसरात घबराट पसरली असून सरपंच अमित मोरजकर तसेच माजी उपसरपंच विघ्नेश चोडणकर यांनी तात्काळ वन विभागाच्या अधिकाऱ्यांसहित घटनास्थळी भेट देऊन परिसराची पाहणी केली. दरम्यान, शुक्रवारी सकाळी स्थानिक तरुणी फियोना बार्रेटो या चर्चच्या प्रार्थनेत सहभागी होण्यासाठी निघाल्या असता त्यांची नजर कंपाऊंडलगतच्या झुडुपात पहुडलेल्या त्या बिबट्यावर गेली. यावेळी, क्षणाचाही विलंब न लावता फियोना बार्रेटो यांनी आपल्या मोबाईलमधून त्याचे फोटो घेतले व ते सोशल मीडियात व्हायरल केले. दरम्यान, ही माहिती पसरताच सरपंच अमित मोरजकर तसेच विघ्नेश चोडणकर यांनी वन अधिकाऱ्यांना घटनास्थळी बोलावून घेतले व परिसरात बिबट्याला जेरबंद करण्यासाठी पिंजरा लावला.