पेडणे: गावडेवाडा कोरगाव येथे अज्ञात व्यक्तीनी रात्रीच्यावेळी सावित्री गावडे या विधवा व ज्येष्ठ महिलेच्या मालकीच्या बागायतीतील फोफळी व दोन माडाचे कवाथे कापून नुकसान केलेल्या बागायतीची पेडणे मिशन फार लोकलचे अध्यक्ष राजन कोरगावकर यांनी पहाणी करून या महिलेचे सांत्वन केले व आर्थिक मदतही दिली.

‘मिशन फॉर लोकल’चे अध्यक्ष राजन कोरगावकर यांनी पेडण्याचे माजी उपनगराध्यक्ष गजानन सावळ देसाई यांच्यासोबत गावडेवाडा - कोरगाव येथे सावित्री गावडे यांच्या बागायतीतील फोफळी व कवाथे कापून नुकसानी केलेल्या बागायतीची पाहणी केली. १३ रोजी रात्री अज्ञातांनी सावित्री गावडे यांच्या मालकीची तीस फोफळीची झाडे व दोन कवाथे कापून टाकले होते.

सावित्री म्हणतात देव त्यांचं भले करो !

सावित्री गावडे म्हणाल्या की , सुमारे आठ वर्षापूर्वी मी व माझ्या मुलीने मेहनत घेऊन या बागायतीत पोफळी व कवाथे लावले होते, मी अन् माझ्या मुलीने ही झाडे वाढवलेली होती.

या बागायतीतील उत्पन्नावरच आमची उपजीविका चालते. आम्ही कुणाचेच वाईट केलेले नाही. तरीही पोफळी व कवाथे कुणी का कापून टाकले ?त्यांना आमचे नुकसन करून काय मिळाले. देव त्यांचे भले करो!.

यावेळी सावित्री गावडे आणि तिच्या मुलीने मदतीचा हात पुढे केल्याबद्दल राजन कोरगावकर यांचे आभार व्यक्त केले.

मुख्यमंत्री निधीतून मदत द्या!

या गरीब ज्येष्ठ महिलेच्या बागायतीची जी नुकसानी झाली आहे. त्यांना मुख्यमंत्र्यांनी मुख्यमंत्री निधीतून साहाय्य करावे, अशी विनंती राजन कोरगावकर यांनी यावेळी करून पेडणे कृषी कार्यालयाने पाहणी करून या महिलेस पोफळी व माडाचे कवाथे लावण्यास द्यावेत, असे सांगितले.