पणजी: पर्वरीतील उड्डाणपुलाच्या कामाचे निमित्त पुढे करून स्थलांतर केलेल्या श्री देव खाप्रेश्वराच्या मूर्तीची आज पुनःप्रतिष्ठापना करण्यात आली. मुख्यमंत्री डॉ. प्रमोद सावंत, पर्यटनमंत्री रोहन खंवटे यांच्यासह अनेकांनी देवाचे दर्शन घेतले. ही मूर्ती स्थलांतरित केल्यामुळे सरकारला रोषाला सामोरे जावे लागले होते. मूर्तीची अन्य जागी प्रतिष्ठापना करण्याची तयारीही सरकारने दर्शवली होती. श्री देव खाप्रेश्वराची मूर्ती मूळ जागेच्या परिसरातच प्रतिष्ठापित केली जावी असा भाविकांचा आग्रह होता. त्यानुसार रविवारी पुनःप्रतिष्ठापना करण्यात आली.

धार्मिक सोहळ्यास मुख्यमंत्री डॉ. प्रमोद सावंत उपस्थित होते. मुख्यमंत्री म्हणाले, “पुनःप्रतिष्ठापित हे मंदिर नवसाज सौंदर्य आणि दैवी तेज घेऊन उभे राहिले आहे. खाप्रेश्वराची आध्यात्मिक ऊर्जा आता अधिक प्रभावीपणे जाणवते.” कॉंग्रेसचे प्रदेशाध्यक्ष अमित पाटकर, आमदार केदार नाईक, प्रवीण आर्लेकर, संकल्प आमोणकर, माजी आमदार ग्लेन टिकलो आदींनी दिवसभरात देवदर्शन घेतले.