पणजी: कला अकादमीमध्ये पुरुष या नाटकाचा प्रयोग सुरु असताना अचानक लाईट्स फ्लिकर व्हायला सुरुवात झाली आणि पुरुष या नाटकाचा पहिला अंक काही काळासाठी बंद करावा लागला. नाटकाचे निर्माते शरद पोंक्षे यांनी सर्वांसमोर येत माफी मागीतली आणि यानंतर आता गोवा सरकारवर सगळीकडून टीका केली जात आहे. या घटनेवर गोव्यातील प्रसिद्ध अभिनेता राजदीप नाईक याने मत व्यक्त केले आहे.

शरद पोंक्षेंनी कारण नसताना माफी मागितली असं म्हणत त्यांनी ही चूक सर्वस्वीपणे कला अकादमीची असल्याचा दावा केला. कला अकादमीचे पुनर्निर्माण झाल्यापासून अशा छोट्या-मोठ्या त्रुटींची वेळोवेळी दाखल घेतली जावी अशी मागणी स्थानिक कलाकारांकडून केली जायची मात्र यावर फारसं लक्ष दिलं गेलं नाही असं नाईक म्हणाले आहेत.

अनेकवेळा नाटक करताना किंवा बघताना रंगमंच्याबरोबरच आणखीन त्रुटींबद्दल सांगून देखील सरकार कान असून नसल्यासारखं वागायचं. यानंतर 'कला मांड' नावाची कमिटी स्थापन करण्यात आली मात्र त्यांनी देखील काहीही सुधारणा केल्या नाहीत.

कला आणि संस्कृती खात्याचे मंत्री गोविंद गावडे यांना कला अकादमीत काही गैर प्रकार झालाय असं वाटत नाही, किंबहुना त्यांना काहीही पर्वा नाही, मात्र मुख्यमंत्री आणि नवनिर्वाचित अध्यक्ष दामू नाईक यांनी तरी किमान कला अकादमीकडे लक्ष द्यावं अशी मागणी त्यांनी केलीये.