मडगाव: वीज खात्याची परवानगी न घेता आकें या भागात बेकायदेशीररित्या वीज खांबांवर चढवलेले केबल्स काढून टाकण्याची मोहीम आजपासून सुरू केली.

लोकांच्या सुरक्षेच्या दृष्टीतूनच ही कारवाई केली जात असल्याचा दावा वीज खात्याने केला असला तरी त्यामुळे या केबल्सवर चालणारी खासगी कंपनीची ‘वाय फाय’ यंत्रणा आणि केबल टीव्ही ठप्प झाल्याने लोकांचे हाल झाले.

वीज खात्याचे कार्यकारी अभियंते काशिनाथ शेटये यांच्या देखरेखीखाली आज ही मोहीम हाती घेण्यात आली. हे केबल वीज खांबांवर चढवल्याने खांबावर ताण पडून ते खाली वाकू लागले होते. काही ठिकाणी हे खांब तुटून पडण्याच्या अवस्थेत होते.