वाळपई: सरकार लाखो रुपये खर्च करते. मात्र, ज्या ठिकाणी खरीच गरज असते त्याठिकाणी त्यांचे दुर्लक्ष होते.अशीच अवस्था वाळपई नगरपालिका प्रभाग २ मध्ये असलेल्या गुंडेलवाडा-वेळूस-वाळपई येथील सरकारी प्राथमिक शाळेची झालेली आहे.

या शाळेच्या छपराची दुरुस्ती महिनाभरापासून रखडल्यामुळे विद्यार्थ्यांना भर पावसात शिकण्याची वेळ आली आहे. शाळा सुरू होऊनही अद्याप दुरुस्तीचे काम सुरू झालेले नाही, यामुळे पालकांमध्ये तीव्र संताप व्यक्त होत आहे.

या संबंधी माहिती अशी की, ही शाळा सुमारे ३५ वर्षांपूर्वी बांधण्यात आली होती. त्यानतंर  या शाळेची एकदाच  काही प्रमाणात दुरुस्ती केली होती. त्यानंतर गेल्या अनेक वर्षांपासून  या इमारतीची दुरुस्ती करा किंवा नवीन इमारत बांधा अशी मागणी पालकवर्गाकडून केली जात आहे.

गेल्या काही वर्षांपासून शाळेच्या छपरातून गळती सुरूच असते. त्यामुळे मुलांना वर्गात पाण्यातच बसावे लागते. शाळा जुनी झाल्यामुळे छप्पर खराब झाले आहे. काही लाकडी खांब मोडकळीस आले आहेत. भिंतीला तडा गेलेला आहे. शौचालयाचीही  दयनीय अवस्था आहे. त्यामुळे येथे नवीन सुसज्ज अशी इमारत व्हावी, अशी मागणी होत आहे.