गेल्या काही दिवसांपासून असह्य उष्णता आणि दमट हवामानाचा सामना करणाऱ्या गोवेकरांसाठी अखेर दिलासादायक बातमी आली आहे. गोव्यातील विविध भागांत अचानक हवामानात बदल होऊन अवकाळी पावसाने जोरदार हजेरी लावली आहे. दुपारच्या सुमारास आकाशात काळे ढग जमा झाले आणि सोसाट्याच्या वाऱ्यासह पावसाच्या सरी बरसण्यास सुरुवात झाली. या अवकाळी पावसामुळे गेले अनेक दिवस कडक उन्हामुळे आणि उकाड्यामुळे हैराण झालेल्या स्थानिक नागरिकांना आणि पर्यटकांना काहीसा दिलासा मिळाला असून वातावरणात कमालीचा गारवा निर्माण झाला आहे.