म्हादईच्या पाण्यावरुन गोवा आणि कर्नाटक यांच्यातील वाद सर्वश्रुत आहे. यातच आता, म्हादईच्या पाण्यावरुन गोव्यातील राजकीय वातावरण पुन्हा एकदा तापू लागले आहे. रिव्ह्युलेशनरी गोवन्स पक्षाचे नेते मनोज परब यांनी गोव्यातील कॉंग्रेसचे खासदार विरियातो फर्नांडिस यांचा म्हादईच्या पाण्याच्या मुद्यावरुन चांगलाच समाचार घेतला. परब यांनी पत्रकार परिषद घेवून फर्नांडिस यांच्यावर टीकास्त्र डागले. कर्नाटक म्हाईच्या पाण्यावर डल्ला मारण्याचा प्रयत्न करत आहे. गोव्याच्या हक्काचे पाणी कर्नाटक पळवत आहे. मात्र गोव्यातील कॉंग्रेसी नेते चिडीचूप आहेत. म्हादईच्या पाण्यासाठी आझाद मैदानावर टाहो फोडत सरकारवर टीका करणारे अमित पाटकर, विरियातो फर्नांडिस आणि युरी आलेमाव आता कुठे आहेत? असा सवालही यावेळी परब यांनी विचारला.