फोंडा : कोडार येथे नियोजित आयआयटी प्रकल्पाला ग्रामस्थांचा विरोध वाढत चालला आहे. कसमशेळ भागातील ग्रामस्थांनीही एकत्रित येऊन आज आपला विरोध दर्शविला. सरकारने नैसर्गिक जैवसंपदा नष्ट करू नये, आयआयटी आणण्याची सरकारने सक्ती केल्यास संघटित लढा उभारू, असा इशाराही त्‍यांनी दिला.

कोडार-बेतोडा गावात नैसर्गिक समृद्धी असून त्याचा ऱ्हास होऊ नये अशी मनीषा व्यक्त करताना मुख्यमंत्री डॉ. प्रमोद सावंत यांना कुणीतरी चुकीची माहिती दिली आहे. खुद्द कसमशेळ गावात ९५ टक्के लोक कृषीकार्डधारक असल्याचे ग्रामस्थांनी सांगितले.

जैवसंपदा असलेल्या या गावात रानटी जनावरेही वावरत असतात. मात्र शेतकऱ्यांनी आपली बागायती आणि शेती सोडलेली नाही. शेती आणि बागायतीमुळेच येथील रोजी-रोटी टिकून राहिली असून शेतकऱ्यांच्या कष्टामुळे या ठिकाणी फुलणारे मळे हे आर्थिक साधन बनले आहे. आयआयटी आल्यास ही जैवसंपदा नष्ट होण्याचा धोका असून सरकारने या भागात आयआयटी आणण्याचा विचार सोडून द्यावा आणि नैसर्गिक संपत्तीचे रक्षण करावे, अशी जोरदार मागणी ग्रामस्थांनी केली.