सत्तरीत विचित्र घटना! भर बाजारात सापडली हाडं,परिसरात खळबळ; नेमकं काय घडलं? वाचा

Bones discovery sattari Goa: सत्तरी तालुक्यातील वाळपई शहरात एक विचित्र आणि गूढ प्रकरण समोर आले आहे. येथील मुख्य बाजारपेठेत जितेंद्र काटकर यांच्या दुकानाच्या मागील बाजूस काही हाडे आढळून आल्याने परिसरात खळबळ उडाली आहे. ही हाडे नेमकी कशाची आहेत, याबाबत अजूनही माहिती मिळालेली नाही.

ही हाडं टाकली तरी कोण?

जितेंद्र काटकर यांना त्यांच्या घराच्या मागील बाजूस ही हाडे दिसताच त्यांनी तातडीने वाळपई पोलीस आणि पशुवैद्यकीय डॉक्टरांना याची माहिती दिली. घटनेचे गांभीर्य लक्षात घेऊन पोलीस आणि डॉक्टरांनी घटनास्थळी येऊन पंचनामा केला आणि तपासणीसाठी ती हाडे ताब्यात घेतली आहेत.

या घटनेमुळे स्थानिक रहिवाशांमध्ये अनेक प्रश्न निर्माण झाले आहेत. ज्या ठिकाणी ही हाडे सापडली, त्याच परिसरात 'अवर लेडी' नावाची प्राथमिक शाळा आणि एक रुग्णालयही आहे. एवढ्या रहदारीच्या ठिकाणी आणि संवेदनशील परिसरात कोणी ही हाडे आणून टाकली असावीत, असा प्रश्न स्थानिकांना सतावत आहे.

सध्या पोलीस या प्रकरणाचा सखोल तपास करत आहेत. पोलिसांनी दिलेल्या प्राथमिक माहितीनुसार, ही हाडे गाईची असण्याची शक्यता आहे, पण तपासणी अहवाल आल्यानंतरच नेमकी माहिती समोर येईल. पुढील तपास पोलीस करत आहेत.