डिचोली: गेल्या चार-पाच दिवसांपासून सुरू असलेल्या दमदार पावसामुळे डिचोलीतील आमठाणे जलाशयातील जलसाठ्यात लक्षणीय वाढ झाली आहे. गुरुवारी सायंकाळपर्यंत जलाशयातील पाण्याची पातळी ४६.९ मीटरपर्यंत पोहोचली असून, चार दिवसांत ती जवळपास एक मीटरने वाढली आहे.

आमठाणे जलाशयावर उत्तर गोव्याचा पाणीपुरवठा अवलंबून आहे. जूनमध्ये अपेक्षेप्रमाणे पाऊस न झाल्याने जलसाठ्याबाबत चिंता व्यक्त होत होती. मात्र गेल्या आठवड्यापासून पावसाने जोर धरल्याने ही चिंता दूर झाली आहे.

जलसाठा नियंत्रित

मेणकुरे-धुमासे पंचायत क्षेत्रात येणाऱ्या आमठाणे धरणाचे कार्यक्षेत्र ५८२ हेक्टर मीटर एवढे आहे. धरणावरील सर्व्हिस गेटसह दुरुस्तीकाम पूर्ण झाल्यानंतर गेल्या जानेवारी महिन्यात या धरणातील जलसाठ्याची पातळी नियंत्रित करण्यात आली होती. मात्र त्यानंतर पाण्याची पातळी कमी होऊन सभोवतालचे पात्र कोरडे पडले होते. आता या जलाशयात मुबलक साठा आहे.