डिचोली: डिचोलीच्या सामाजिक आरोग्य केंद्रात लावलेला ‘तो’ वादग्रस्त फलक अखेर काढण्याची नामुश्की आरोग्य केंद्राच्या अधिकाऱ्यांवर आली. बांबोळी येथील गोवा वैद्यकीय महाविद्यालय इस्पितळात व्हिडीओग्राफी करण्यास बंदी घालणारा आदेश जारी करताना तशा आशयाचा फलकही लावला आहे. मात्र, या आदेशाचा चुकीचा अर्थ लावत डिचोलीच्या सामाजिक आरोग्य केंद्रात ‘पत्रकारांना प्रवेश बंदी’ अशा आशयाचा फलक लावला होता. या फलकावरून पत्रकारांमध्ये मोठी खळबळ उडून हा वादाचा विषय बनला होता.

गोवा श्रमिक पत्रकार संघटनेसह (गुज) स्थानिक पत्रकारांनी या प्रकरणाचा निषेध केला होता. जागृत नागरिकांनीही या फलकावरून आश्चर्य व्यक्त केले होते. अखेर हे प्रकरण अंगलट येण्याची शक्यता निर्माण झाल्याने डिचोलीच्या आरोग्य केंद्राच्या अधिकाऱ्यांनी ‘तो’ वादग्रस्त फलक गायब केला. त्यामुळे या फलकावरून निर्माण झालेला वाद तूर्त निवळल्यातच जमा आहे. हा फलक आरोग्य खात्याच्या आदेशानुसार लावला होता, की आरोग्य खात्याच्या अधिकाऱ्यांचा हा आततायीपणा? ते समजू शकले नाही. मात्र, या फलकावरून मात्र वादाची ठिणगी पडली होती.