पणजी: जलसंपदा खात्याच्या मुख्य अभियंतापदाचा ताबा अखेर अतिरिक्त मुख्य अभियंता ज्ञानेश्वर सालेलकर यांच्याकडे देण्यात आला आहे. ३१ मे २०२२ पासून सलग चार वर्षे सेवा मुदतवाढ मिळवणारे प्रमोद बदामी यांना सेवामुक्त करण्यात आले आहे. गोवा अनुसूचित जाती, जमाती आयोगाने बदामी यांची सेवा मुदतवाढ समाप्त करण्याचा निवाडा दिला आणि सरकारने तातडीने बदामी यांना पदमुक्त केले. जलसंपदा खात्यात मुख्य अभियंता पदासाठी लायक उमेदवार नाहीत, असे कारण देत सरकार बदामी यांना सेवा मुदतवाढ देत होते. बदामी हे कर्नाटकचे असल्याने म्हादई जलवाटप तंट्यात ते गोव्याची बाजू भक्कमपणे मांडणार नाहीत, सर्वोच्च न्यायालयात सुनावणी होण्यासाठी ते विशेष प्रयत्न करणार नाहीत, असा आरोप करून सामाजिक कार्यकर्त्यांनी बदामी यांना सेवामुक्त करण्याची मागणी लावून धरली होती. बदामी यांना सेवा मुदतवाढ दिल्याने आपल्याला मुख्य अभियंता म्हणून कामच करता येणार नाही, असा दावा करून सालेलकर यांच्याकडून आयोगाकडे दाद मागण्यात आली होती. त्यानंतर आयोगाने बदामी यांची सेवा मुदतवाढ समाप्त करण्याचा आदेश दिला होता.