सोशल मीडियावर अनेकजण बॉलीवूड स्टार्सची नक्कल करतात किंवा त्यांना कॉपी करण्याचा प्रयत्न करतात. सोशल मीडियावर अलिकडे एका मुलीचा व्हिडिओ व्हायरल होत आहे. अॅनाली सेरेजोचा असे या मुलीचे नाव आहे. तिचा 'ब्रह्मास्त्र'मधील आलिया भट्टची नक्कल करतानाचा व्हिडिओ प्रचंड गाजला. नुकताच तिचा नवीन व्हिडीओ आला असून, यात ती जया बच्चन यांची नक्कल करताना दिसत आहे.

जया बच्चन यांचा यापूर्वी एक व्हिडिओ समोर आला होता, ज्यामध्ये त्या मिडियावर रागावताना दिसत आहेत. या व्हिडिओमध्ये जया बच्चन त्यांची नात नंदासोबत एका फॅशन शोमधून बाहेर पडत आहेत. त्यानंतर त्यांना अनेक मिडिया कर्मचाऱ्यांनी घेरले. यावेळी जया बच्चन मिडिया कर्मचाऱ्यांवर रागवताना दिसत आहेत. दरम्यान, त्यांची नात नंदा आपल्या आजीला शांत करताना दिसत आहे.

अन्नाली सेरेजोने याच घटनेतील जया बच्चन यांची नक्कल करणारा व्हिडिओ शेअर केला आहे. हा व्हिडिओ सोशल मीडियावर मोठ्या प्रमाणात व्हायरल होत आहे. या व्हिडिओमध्ये अन्नालीने जया बच्चन यांच्यासारखा मेकअप करण्याचा प्रयत्न केला आहे. या व्हिडिओमध्ये जया बच्चन मिडिया कर्मचाऱ्यांना जे काही म्हणाल्या त्याच ओळी अन्नाली व्हिडिओत बोलताना दिसत आहे. इतकंच नाही तर ती तिच्या चेहऱ्यावरचे हावभाव सारखे करण्याचा प्रयत्न करत आहे.

अन्नाली सेरेजोचा हा व्हिडिओ सोशल मीडियावरील चाहत्यांना खूप आवडला असून, हा व्हिडिओ आतापर्यंत 94 हजारांहून अधिक लोकांनी पाहिला आहे. हा व्हिडिओ व्हायरल झाला पाहिजे, अशी कमेन्ट एका यूजरने या व्हिडिओवर दिली आहे.