राज्यातील विद्यार्थ्यांसाठी एक आनंदाची बातमी आहे. सिंधुदुर्ग जिल्ह्यात प्रथमच वैद्यकिय महाविद्यालयात (first government medical college in sindhudurg) यंदाच्या वर्षापासून अभ्यासक्रम सुरु होणार आहे. महाराष्ट्र राज्याचे उच्च तंत्रज्ञान मंत्री उदय सामंत (Minister Uday Samant) यांनी सोमवारी पत्रकार परिषदेदरम्यान ही माहिती दिली. यावर्षीपासून 100 विद्यार्थ्यांची पहिली बॅच सुरु होणार असल्याचे यावेळी त्यांनी सांगितले.

दरम्यान, याबाबत माहिती देताना सामंत म्हणाले, सिंधुदुर्गात शासकीय महाविद्यालय सुरु व्हावं यासाठी कोकणविसांची मागील 30 ते 35 वर्षापासूनची इच्छा होती. 996 कोटी रुपयांच्या योजनेमधून या महाविद्यालयाचं काम सुरु झालं. त्यानंतर यंदा प्रवेश होणार की, नाही अशा चर्चाही सुरु झाल्या आहेत. परंतु मला सांगताना आनंद होत आहे की, कोकणातील शैक्षणिक विकासाचं एक नवे दालन यंदाच्या वर्षीपासून सुरु होत आहे. 100 विद्यार्थ्याचे वैद्यकीय महाविद्यालयाचे अॅडमिशन यावर्षीपासून सुरु करण्यात येत आहे. यासाठी मेडिकलच्या शिखर संस्थेने यासंबंधीची परवानगी दिली आहे.

शिवाय, या वैद्यकीय महाविद्यालयाचे इन्फ्रास्ट्रक्चर आणि अन्य सोयीसुविधांवर स्थानिक प्रशासनाने काम सुरु केले आहे. विशेष म्हणजे हे वैद्यकीय महाविद्यालय आणि चीपी विमानतळ यावर्षीपासून सुरु होत आहे. आघाडी सरकारचे मुख्यमंत्री उध्दव ठाकरे (Chief Minister Uddhav Thackeray) यांनी दिलेल्या आश्वासनाची पूर्तता झाली आहे. या वैद्यकीय महाविद्यालयाला देखील शिखर संस्थेने यास परवानगी दिली आहे. तसेच, कोरोनाचं कोणतही कारण न देता ही विकासकामे राज्य सरकारच्या माध्यमातून पूर्ण झाली आहेत, असही यावेळी सामंत यांनी सांगितले आहे.