मुंबई: पवई येथील आरए स्टुडिओमध्ये १७ मुलांना ओलीस ठेवल्याची घटना गुरुवारी (३० ऑक्टोबर) उघडकीस आली. याप्रकरणात मुलांना ओलिस ठेवणाऱ्या रोहित आर्यचा पोलिसांच्या गोळीबारात मृत्यू झाल्याची माहिती समोर आली आहे. पोलिस आणि जवानांनी मुलांना सुरक्षितपणे बाहेर काढले आहे.

रोहित आर्यने आरए स्टुडिओच्या पहिल्या मजल्यावर मुलांना ओलीस ठेवण्यात आले होते. तेथे अॅक्टिंगचे क्लासेस घेतले जातात. मुले स्टुडिओच्या खिडक्यांमधून बाहेर डोकावताना दिसली. घटनेची माहिती मिळताच त्यांचे पालकही आले. सुमारे १०० मुलांना ऑडिशनसाठी बोलावण्यात आल्याचे वृत्त आहे. घटनेची माहिती मिळताच पोलिस आणि विशेष कमांडोंनी कारवाई केली.

संशयिताला अटक करुन मुलांची सुटका करण्यात आली. रोहित आर्य मानसिकदृष्ट्या अस्थिर असल्याचे मुंबई पोलिसांनी सांगितले होते. दरम्यान, मुलांना ओलीस ठेवून स्वतःच्या मागण्यांसाठी दबाव आणणाऱ्या संशयिताचे नाव रोहित आर्य असल्याचे स्पष्ट झाले. पोलिसांनी केलेल्या गोळीबारात रोहितला गोळी लागली यातचा त्याचा मृत्यू झाल्याची माहिती समोर आली आहे.

महाराष्ट्र शासनाच्या एका योजनेसाठी आर्य काम करत होता पण, त्याचा पैसा त्याला मिळाला नव्हाता, असा आरोप त्याने केला होता. दरम्यान, पोलिसांनी आर्यने ओलिस ठेवलेल्या मुलांना सुखरुप बाहेर काढले आहे.

याचवेळी झालेल्या झटापटीत रोहितला गोळी लागल्याची माहिती समोर आली आहे. यातच नंतर त्याचा मृत्यू झाल्याचे सांगितले जाते. मुलांना ओलिस ठेवल्यानंतर त्याने एक व्हिडिओ देखील प्रसिद्ध केला होता.