कोकणात सध्या पावसानं थैमान घातलं आहे. सातत्याने बरसणाऱ्या संततधारेमुळे रत्नागिरीसह शेजारील जिल्ह्यातील जनजीवन विस्कळीत झाले आहे. तर अनेक नद्यांनी धोकादायक पातळी ओलांडली आहे. अनेक ठिकाणी वाहतूकही ठप्प झाली आहे.

याचदरम्यान, मुंबई-गोवा महामार्गाच्या (Mumbai Goa Highway) दर्जाबाबतही प्रश्नचिन्ह निर्माण झाले आहे. खेड भरणे येथील नवीन पुलाला मोठे तडे गेल्याने एका बाजूची वाहतूक बंद करण्यात आली.

दरम्यान, महामार्गावरील भरणे नाका येथे जगबुडी नदीवरील पुलाला मोठे तडे गेल्याने या ठिकाणी पोलीस फौजफाटा तैनात करण्यात आला आहे. खेड भरणे पूल धोकादायक बनल्याने मोठी खळबळ उडाली. त्यामुळे या महामार्गावरील वाहतूक बंद करण्यात आली

आता या राष्ट्रीय महामार्गाच्या कामाच्या दर्जाबाबत प्रश्नचिन्ह निर्माण झाले आहे. निकृष्ठ दर्जाचे काम करण्यात येत असल्याचे बोलले जावू लागले आहे. तर परशुराम घाट दरडही कोसळली. चिपळूण बबहादुरशेख नाक्यावरचाही पूल कोसळला.

गेल्या दोन दिवसांपासून पडत असलेल्या पावसामुळे रत्नागिरी (Ratnagiri) जिल्ह्यातील राजापूर शहरात पुन्हा पूरसदृश्य परिस्थिती निर्माण झाली आहे. शहरातील अर्जुना आणि कोदवली नद्यांच्या पाण्याच्या पातळी प्रचंड वाढ झाली आहे. त्यामुळे पुराचे पाणी जवाहर चौकापर्यंत पोहोचले आहे. तर अर्जुना नदीपात्रात असलेलं पुंडलिक मंदिरही पाण्याखाली गेलं आहे.