Lok Sabha Elections: 2024 च्या लोकसभा निवडणुकीसाठी उद्धव ठाकरे हे विजयी चेहरा नाहीत, त्यामुळे त्यांनी भारतीय जनता पक्षाशी (BJP) युती करणे आवश्यक असल्याचे मत बंडखोर शिवसेना नेते राहुल शेवाळे यांनी गुरुवारी व्यक्त केले. मंगळवारी लोकसभेत पक्षाचे नेते म्हणून नियुक्त झालेले शेवाळे म्हणाले की, 'शिवसेनेत फूट पडण्यापूर्वी आम्ही आगामी सार्वत्रिक निवडणुकांबाबत नेतृत्वाचा मुद्दा उद्धव ठाकरे यांच्यासमवेत अनेक बैठकांमध्ये उपस्थित केला होता.'

शेवाळे पुढे म्हणाले, “मी ठाकरे यांच्या भेटीत लोकसभा निवडणुकीसाठी नेतृत्वाचा मुद्दा उपस्थित केला होता, ज्यामध्ये संजय राऊत (Sanjay Raut) देखील उपस्थित होते. निवडणुकीचा चेहरा म्हणून राऊत यांनी उध्दव ठाकरे यांचे नाव पुढे केले होते. त्यावर मी त्यांना सांगितले की, आम्ही उध्दव ठाकरेंचा (Uddhav Thackeray) आदर करतो, परंतु आपण वास्तववादी असले पाहिजे. ते लोकसभा निवडणुकीचा चेहरा होऊ शकत नाही.'

शेवाळे पुढे म्हणाले की, शिवसेना (Shiv Sena), राष्ट्रवादी काँग्रेस आणि काँग्रेसच्या युतीमुळे राज्यातील राजकीय समीकरणे अधिक गुंतागुंतीची बनली आहेत. शेवाळे पुढे असेही म्हणाले की, 'संयुक्त पुरोगामी आघाडी ( UPA) राहुल गांधी यांच्या नेतृत्वाखाली निवडणूक लढवेल, जी त्यांच्या कार्यकर्त्यांना मान्य होणार नाही.' शेवाळे आणि अन्य 11 लोकसभा सदस्यांनी आपली भूमिका बदलली. हे बारा लोकसभा खासदार बंडखोर शिवसेना नेते आणि महाराष्ट्र राज्याचे मुख्यमंत्री एकनाथ शिंदे यांच्या गटात सामील झाले आहेत.

दुसरीकडे, शिवसेनेतील प्रचंड बंडखोरीमुळे उध्दव ठाकरेंना मुख्यमंत्रीपदावरुन पायउतार व्हावे लागले. 30 जून रोजी बंडखोर नेते एकनाथ शिंदे महाराष्ट्राच्या मुख्यमंत्रीपदी विराजमान झाले. शिवसेनेचे अनेक नेते भाजपसोबत युती करण्याच्या बाजूने असून पुढील लोकसभा निवडणूक पंतप्रधान नरेंद्र मोदी यांच्या नेतृत्वाखाली लढण्यास इच्छुक असल्याचे प्रतिपादन शेवाळे यांनी केले.