भारताच्या माजी पंतप्रधान इंदिरा गांधी यांच्या जयंतीनिमित्त भारत जोडो यात्रेत (Bharat Jodo Yatra) नारी शक्तींच दर्शन पाहायला मिळणार आहे. यामध्ये कॉंग्रेसच्या महिला खासदार, आमदार आणि स्थानिक स्वराज्य संस्थांमधील पदाधिकारी सहभागी होणार आहेत. इंदिरा गांधी यांच्या जयंतीनिमित्त कॉंग्रेसने महिलांच्या सन्मानासाठी मोठे पाऊल उचलल्याची चर्चा आहे.

कॉंग्रेसच्या भारत जोडो यात्रेला आज शेगावातील गजाननदादा मार्केट यार्डपासून सुरुवात झाली आहे. त्यानंतर यात्रा विश्रांतीसाठी सकाळी 10 वाजता जलंब या ठिकाणी थांबली होती. विश्रांतीनंतर दुपारी चार वाजता पुन्हा पदयात्रेस सुरुवात होणार आहे. त्यानंतर संध्याकाळी भस्तानमध्ये राहुल गांधी (Rahul Gandhi) कॉर्नर सभा घेणार आहेत. ही सभा संपल्यानंतर भेंडवळमध्ये यात्रेचा मुक्काम असणार आहे.

इंदिरा गांधी (Indira Gandhi) यांच्या जयंतीनिमित्त आज भारत जोडो यात्रेच्या पहिल्या रांगेत कॉंग्रेसच्या महिला खासदार, आमदार, पंचायत समिती सदस्य, पदाधिकारी आणि महिला पदयात्री राहुल गांधी यांच्यासह पहिल्या रांगेत चालणार आहेत. राहुल गांधी यांच्या भारत जोडो यात्रेला तरुणांसह महिलांचा (Women) मोठा प्रतिसाद मिळत असल्याने आजच्या पदयात्रेत मोठ्या संख्येने महिलांची उपस्थिती राहण्याची शक्यता आहे.