मुंबई येथून एक धक्कादायक घटना समोर आली आहे. वडीलांच्या आजारपणाला कंटाळलेल्या 21 वर्षीय मुलाने त्यांचा खून केला आहे. पोलिसांनी मुलाला अटक केली आहे. वडील झोपेत असताना त्याने त्यांच्या डोक्यात दगड घातला व नंतर चाकूने गळा चिरला. बुधवारी डोंबिवली येथे ही घटना घडली.

तेजस शिंदे (वय 21) असे या अटक मुलाचे नाव आहे. मुलानेच पोलिसाने फोन करून आपल्या गुन्ह्याची कबुली दिली आहे. श्यामसुंदर (68) असे खून झालेल्या व्यक्तीचे नाव आहे. व्यक्तीचा मृतदेह घरात सापडला असून, सर्वत्र रक्ताचा सडा पडला होता.

मागील काही दिवसांपासून तेजसचे वडील आजारी होते. त्याचे आणि वडीलांचे दररोज खटके उडायचे व वाद व्हायचा असे पोलिस तपासात समोर आले आहे.

बुधवारी ही घटना होण्यापूर्वी दोघांमध्ये मोठा वाद झाला. यावेळी तेजसची आई घराबाहेर पडली. त्यानंतर श्यामसुंदर झोपी गेले, त्याचवेळी तेजसने आपल्या वडीलांचा खून केला. असे पोलिसांनी सांगितले.

तेजस पदवीचे शिक्षण घेत होता आणि त्याच्या वडीलांना पंधरा हजार रूपये निवृत्तीवेतन होते. यावर त्यांच्या घराचा उदरनिर्वाह चालत होता. वडील मुंबई पालिकेत सुरक्षा रक्षम म्हणून काम करत होते. तेजसला अटक करण्यात आली असून, पुढील तपास पोलिस करत आहेत.