केंद्रीय निवडणूक आयोगाने शिवसेनेचे धनुष्यबाण हे निवडणूक चिन्ह गोठवल्यानंतर दोन्ही गटाकडून चिन्हे सादर करण्यात आली होती. शिवसेनेच्या शिंदे गटाने निवडणूक आयोगाला पुन्हा तीन चिन्हांचा पर्याय सादर केला आहे. शिंदे गटाने दिलेल्या पर्यायांपैकी निवडणूक आयोगाकडून 'तळपता सूर्य' चिन्हाला परवानगी देण्याची शक्यता आहे. त्यामुळे आता महाराष्ट्राच्या (Maharashtra) राजकारणात शिवसेनेच्या (Shiv Sena) दोन गटात मशाल विरुद्ध तळपता सूर्य असा सामना रंगणार असल्याची चर्चा सुरू झाली आहे.

दरम्यान, सोमवारी निवडणूक आयोगाने (Election Commission) ठाकरे गटाला 'शिवसेना- उद्धव बाळासाहेब ठाकरे' हे नाव आणि मशाल हे चिन्ह दिले. तर, शिंदे गटाला 'बाळासाहेबांची शिवसेना' असे नाव दिले. पण शिंदे गटाने चिन्हासाठी दिलेले तिन्ही पर्याय फेटाळून लावले होते. त्यानंतर निवडणूक आयोगाने आज सकाळपर्यंत नवीन चिन्हाचा पर्याय देण्याचे आदेश दिले होते. त्यानुसार, आज सकाळी शिंदे (Shinde) गटाने निवडणूक आयोगाला ई-मेल द्वारे निवडणूक चिन्हाचे पर्याय पाठवले होते. यामध्ये तळपता सूर्य, ढाल तलवार आणि पिंपळाचे झाड हा पर्याय पाठवला होता. त्यापैकी निवडणूक आयोगाने 'तळपता सूर्य' हे निवडणूक चिन्ह शिंदे गटाला देण्याची अधिक शक्यता आहे.

शिवसेनेच्या उद्धव ठाकरे गटाला निवडणूक आयोगाने 'मशाल' निवडणूक चिन्ह दिले आहे. ठाकरे गटाने त्रिशुळ, उगवता सूर्य आणि मशाल या चिन्हांचा पर्याय दिला होता. निवडणूक आयोगाच्या घोषणेनंतर ठाकरे गटाकडून मशाल या चिन्हाचा सोशल मीडियावर (Social Media) जोरदार प्रचार करण्यात आला. शिवसैनिकांकडून जल्लोषात या चिन्हाचे स्वागत करण्यात आले.