Nashik Live In Partner Murder Case: महाराष्ट्रातील नाशिकमध्ये एका महिला लिव्ह-इन पार्टनरने अत्यंत निर्घृणरित्या आपल्याच प्रियकराची गळा चिरुन हत्या केल्याची धक्कादायक घटना समोर आली. हत्या केल्यानंतर पुराव्यांची विल्हेवाट लावण्यासाठी मृतदेह तब्बल 18 तास घरातच लपवून ठेवण्यात आला आणि त्यानंतर मध्यरात्री कारमधून नेऊन कसारा घाटात फेकून देण्यात आला.

नाशिक शहर गुन्हे शाखा युनिट-1च्या पथकाने तांत्रिक विश्लेषणाच्या आधारे या हत्येचा छडा लावत कसारा घाटातून मृतदेह ताब्यात घेतला. या प्रकरणी पोलिसांनी मुख्य संशयित महिलेसह तिच्या दोन साथीदारांना अटक केली असून नाशिक (Nashik) गुन्हे शाखा अधिक तपास करत आहे.

मिळालेल्या माहितीनुसार, वसंत गोरखनाथ सातपुते (वय 40, रा. स्वराजनगर, पाथर्डी फाटा, नाशिक) असे मृत व्यक्तीचे नाव आहे. वसंत सातपुते हे संशयित हसीना शेख नावाच्या महिलेसोबत गेल्या 15 वर्षांपासून लिव्ह-इन रिलेशनशिपमध्ये राहत होते. वसंत यांना दारु आणि जुगाराचे गंभीर व्यसन होते, ज्यावरुन दोघांमध्ये सतत भांडणे होत असत. या सततच्या त्रासाला कंटाळून हसीना शेख हिने आपल्या साहिल शाह आणि मोईन शाह या दोन मित्रांच्या मदतीने वसंतच्या हत्येचा कट रचला.

कटाची अंमलबजावणी करत संशयितांनी वसंत यांचा धारदार शस्त्राने गळा चिरुन खून केला. हत्येनंतर पकडले जाण्याच्या भीतीने त्यांनी मृतदेह घरातच लपवून ठेवला आणि संधी मिळताच मध्यरात्री कारच्या डिकीत टाकून कसारा घाटातील दरीत फेकून दिला. मात्र, गुन्हे शाखेच्या पथकाने अत्यंत वेगाने सूत्रे हलवत तांत्रिक तपासाच्या आधारे कसारा घाटातील दरीतून मृतदेह बाहेर काढला आणि हसीना शेख, साहिल शाह आणि मोईन शाह या तिघांना ताब्यात घेतले. प्राथमिक चौकशीत हत्येमागे दारु आणि जुगाराचे व्यसन हेच मुख्य कारण असल्याचे समोर येत असून या कटात आणखी कोणाचा सहभाग आहे का? याचा शोध नाशिक पोलीस घेत आहेत. या घटनेमुळे नाशिक शहरात मोठी खळबळ उडाली आहे.