CM Eknath Shinde on Mahadayi Water Dispute: गोवा आणि महाराष्ट्र हे भाऊ-भाऊ आहेत. म्हादई नदीच्या पाण्यासाठीचा लढा हा तीन राज्यांचा प्रश्न आहे आणि हा लढा महाराष्ट्र आणि गोवा एकत्रित लढतील, असे वक्तव्य महाराष्ट्राचे मुख्यमंत्री एकनाथ शिंदे यांनी केले.

महाराष्ट्रातील तिलारी पाटबंधारे प्रकल्पाच्या आंतरराज्य नियंत्रण मंडळाच्या बैठकीनंतर ते बोलत होते. या बैठकीला गोव्याचे मुख्यमंत्री डॉ. प्रमोद सावंत, गोव्याचे जलसंपदा मंत्री सुभाष शिरोडकर आणि महाराष्ट्राचे उपमुख्यमंत्री देवेंद्र फडणवीस प्रमुख उपस्थित होते.

सुमारे एका दशकाच्या कालखंडानंतर या नियंत्रण मंडळाची बैठक झाली आहे.

शिंदे म्हणाले की, गोवा आणि महाराष्ट्राचे नाते भावांसारखे आहे. कर्नाटक विरोधात म्हादईच्या पाण्यासाठीचा लढा गोवा आणि महाराष्ट्र एकत्रित मिळून लढतील.

दरम्यान, तिलारी धरण महाराष्ट्रात आहे. तिलारी कालव्यातून गोव्याला पाणी पुरवठा होतो. पेडणे, डिचोली आणि बार्देश तालुक्यातील काही भागात हा पाणीपुरवठा केला जातो.

दरम्यान, गेल्या काही काळात म्हादई प्रकल्पाबाबत नवीन डीपीआरला मंजुरी मिळाल्यानंतर कर्नाटकने आक्रमकपणे हालचाली सुरू केल्या आहेत. तर गोव्यानेही केंद्रीय नेत्यांची भेट घेत आपली बाजू मांडली आहे.

त्यातूनच केंद्र सरकारने म्हादई प्रवाह या प्राधिकरणाची स्थापना केली आहे. त्याचे कार्यालयदेखील पणजीमध्ये होणार आहे. म्हादई हा गोव्यासाठी अस्मितेचा मुद्दा आहेच पण गोव्याच्या एकूण पर्यावरणावर प्रभाव टाकणारा मुद्दा आहे. त्यामुळे म्हादई बचावासाठीची चळवळही गोव्यात उभी राहिली आहे.