आयएनस निधी घोटाळा प्रकरणी किरीट सोमय्यांचा जामीन न्यायालयाने फेटाळला आहे. त्यामुळे पितापुत्रांच्या अडचणीत वाढ झाली आहे. सोमय्यांनी 11 एप्रिल रोजी मुंबई सत्र न्यायालयात अटकपूर्व जामीन मिळवण्यासाठी याचिका दाखल केली केली होती. सोमय्या आणि त्यांच्या मुलावर 2013-14 मध्ये आयएनएस विक्रांत बचाव मोहिमेदरम्यान जमा झालेल्या पैशांचा गैरवापर केल्याप्रकरणी गुन्हा दाखल करण्यात आला होता. आयएनएस विक्रांत प्रकरणी शिवसेना नेते संजय राऊत यांनी प्रश्न उपस्थित केल्यानंतर भाजप नेते किरीट सोमय्या (Kirit Somaiya) आणि त्यांचा मुलगा नील सोमय्या यांच्याविरोधात एफआयआर दाखल करण्यात आला होता. मात्र आता या प्रकरणी सोमय्यांना मोठा झटका न्यायालयाने दिला आहे. सोमय्यांचा अटकपूर्व जामीन न्यायालयाने फेटाळला आहे.

आरोप-प्रत्यारोपांचा सिलसिला सुरुच

या प्रकरणी किरीट सोमय्या म्हणाले होते की, तक्रारदाराने कोणताही पुरावा सादर केलेला नाही, तरीही मुंबई पोलिसांनी (Mumbai Police) माझ्याविरोधात एफआयआर नोंदवला. संजय राऊत यांनी याआधी 17 प्रकारचे आरोप केले आहेत. परंतु त्यांना एकही पुरावा न्यायालयात सादर करु शकले नव्हते.

आयएनएस विक्रांत प्रकरणात शिवसेना नेते संजय राऊत (Sanjay Raut) आणि भाजप नेते किरीट सोमय्या यांच्यात आरोप-प्रत्यारोपांच्या फैरी झडत आहेत. शिवसेना नेते संजय राऊत यांनी भाजप नेते किरीट सोमय्या (Kirit Somaiya) यांच्यावर दोन दिवसांपूर्वी आयएनएस विक्रांतसाठी जमा केलेल्या पैशांचा अपहार केल्याचा आरोप केला होता.