Maharashtra Politics: कसबा-चिंचवड पोटनिवडणूक गेल्या काही दिवसांपासून मोठ्या चर्चेत आहे. निवडणूकीसाठी उमेदवार जाहीर झाल्यापासून ते मतदानापर्यंत मोठे वादही झाल्याचे दिसून आले. महाविकास आघाडी आणि भाजपसाठी ही निवडणूक महत्वाची मानली जात होती. आता कसब्यात महाविकास आघाडीचे उमेदवार रविंद्र धंगेकर यांनी बाजी मारली आहे.

कसबा- चिंचवड पोटनिवडणूकीत राज्याचे मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनीदेखील या प्रचारात भाग घेतला होता. कसबा पोटनिवडणूकीत भाजपकडून हेमंत रासने आणि तर रविंद्र धंगेकर यांंना महाविकास आघाडीने उमेदवारी दिली होती.

चिंचवड मध्ये भाजपकडून आश्विनी जगताप आणि महाविकास आघाडीकडून राष्ट्रवादी काँग्रसेचे नाना काटे तर राहुल कलाटे हे अपक्ष उमेदवार म्हणून निवडणूकीसाठी उभे राहिले होते.

दरम्यान, आज कसबा-चिंचवड पोटनिवडणूकीचा निकाल जाहीर झाला असून कसब्यात महाविकास आघाडीचे रविंद्र धंगेकर यांनी या निवडणुकीत बाजी मारली आहे. मतमोजणीच्या 20 फेऱ्या पार पडल्या. पहिल्या फेरीपासूनच रविंद्र धंगेकर हे आघाडीवर होते.

रविंद्र धंगेकर हे 11,040 मतांनी विजयी झाले आहेत. तर चिंचवडमध्ये भाजपच्या आश्विनी जगताप या विजयाच्या जवळ असल्याचे दिसून येत आहे. समर्थक घोषणाबाजी करत आनंदाने जल्लोष करताना दिसत आहेत.