Income Tax Raid: ED नंतर आता आयकर विभागही कारवाईच्या तयारीला लागला आहे. प्राप्तिकर विभागाने महाराष्ट्रातील जालना आणि औरंगाबाद येथे छापे टाकले. औरंगाबादमधील एका बिल्डरवर आणि जालन्यातील स्टील कंपनीच्या मालकाच्या सपंत्तीवर हे छापे टाकण्यात आले. या छाप्यात आयकर विभागाने 58 कोटी रुपये रोख आणि 32 किलो सोने जप्त केले आहे. ही रोकड मोजण्यासाठी आयकर विभागाला 13 तास लागले.

या कंपन्यांच्या मालकांवर 3 ऑगस्ट रोजी छापे टाकण्यात आले होते. आयकर विभागाने एसआरजे पीटी स्टील्स प्रा. लि. आणि कालिका स्टील अलॉयज प्रा. लिमिटेड कंपन्यांवर छापे टाकले. या छाप्यात आयकर विभागाला 390 कोटी रुपयांच्या संपत्तीची माहिती मिळाली, जी जप्त करण्यात आली होती. या दरम्यान विभागाचे 260 अधिकारी ही कारवाई करत होते.

छाप्यादरम्यान ही कारवाई पूर्णपणे गोपनीय ठेवण्यात आली होती. याबाबत अधिकृत माहिती कोणालाही देण्यात आलेली नाही. ही कारवाई 1 ऑगस्ट ते 31 ऑगस्टदरम्यान झाली. आयकर विभागाच्या नाशिक पथकाने ही कारवाई केली आहे. आयकर विभागाचे 260 कर्मचारी, 120 वाहने आणि 5 पथकांनी हा छापा टाकला आहे.

रोख मोजण्यासाठी 13 तास

या छाप्यात सापडलेली रोकड जालना स्टेट बँकेत नेऊन मोजण्यात आली आहे. सकाळी 11 वाजता रोख मोजणी सुरू झाली ती दुपारी 1 वाजेपर्यंत चालली. जालन्यातील 4 स्टील कंपन्यांच्या वर्तनात अनियमितता असल्याची माहिती आयकर विभागाला मिळाली होती. यानंतर विभागाने कारवाई करत छापा टाकला. या छाप्यात घरामध्ये काहीही सापडले नाही, मात्र शहराबाहेरील एका फार्महाऊसमधून रोख रक्कम जप्त करण्यात आली आहे.