Pankaja Munde: भाजप नेत्या पंकजा मुंडे यांचा एक व्हिडिओ सोशल मीडियात व्हायरल झाला आहे. या व्हिडिओत त्यांनी त्या कुणाला घाबरतात ते सांगितले आहे. दरम्यान, कार्यकर्ते मला हीरोच मानतात, हीरोईन नाही, असेही त्या म्हणाल्या.

पंकजा मुंडे म्हणाल्या की, आपण जगात कुणालाच घाबरत नाही, पण मी माझ्या मुलाला खूप घाबरते, असं वक्तव्य पंकजा मुंडे यांनी एका कार्यक्रमात केले. यावेळी त्यांनी यामागचं कारणही सांगितलं. भाजप नेत्या पंकजा मुंडे यांनी अंबाजोगाई येथील विद्यार्थ्यांशी संवाद साधला. यावेळचा त्यांचा हा व्हिडीओ सध्या सोशल मीडियावर तुफान व्हायरल होत आहे.

पंकजा मुंडे म्हणाल्या की, माझा मुलगा 21 वर्षाचा आहे, त्यामुळे मला कळत नाही की तुमच्याशी कसं बोलावं. त्याला बोलताना पण मी खूप घाबरते. या जगात मी कुणालाच घाबरत नाही, पण माझ्या मुलाला ‘आर्यामन’ला मी खूप घाबरते. कारण तुमची बुद्धी एवढी तीक्ष्ण आणि तीव्र आहे की, त्यामुळे तुमच्यासोबत वाद घालण्यात काहीही अर्थ नसतो. तुमच्या उत्तरामुळे आम्हीच बुचकाळ्यात पडतो. त्यामुळे आम्हालाच प्रश्न पडतो की, आता याला काय उत्तर द्यायचं. त्यामुळे तुमच्यासमोर येणं माझ्यासाठी फार आनंदाची, अभिमानाची आणि तेवढीच जबाबदारीची गोष्ट आहे.

तसेच, मला माझ्या युवा मोर्चाचे कार्यकर्ते हिरोच म्हणतात, हिरोईन म्हणतच नाहीत. असही पंकजा मुंडे म्हणाल्या.

दरम्यान, काही दिवसांपुर्वी महाराष्ट्र भाजपचे प्रदेशाध्यक्ष चंद्रशेखर बावनकुळे यांच्यासोबतचा पंकजा मुंडेंचा एक व्हिडिओ सोशल मीडियात व्हायरल झाला होता. त्यात पंकजा मुंडे व्यासपीठावर भाषणासाठी माईकजवळ येतात आणि मला आधी बोलू द्या, अशी विनंती बावनकुळेंना करताना दिसतात, असे दिसत होते, तथापि, बावनकुळे यांनी त्यांना नकार देत स्वतःच बोलायला सुरवात केली होती.